Komîn yek ji hîmê sereke yê avakirin û rêxistinkirina civakê ye. Li bakurê Sûriyê di xebatên rêxistinkirin û pîştgiriya civakê de komîn xwedî roleke sereke ye. Di vê çarçoveyê de avakirina komînan dewam dike. Li Reqayê jî piştî ku hat rizgarkirin niha avakirina komînan didome.
Pêngava avakirina komînan li bajarê Reqayê dewam dike. Li Taxa El Nehda 14 komîn hatin ava kirin.
Piştî ku bajarê Reqayê ji aliyê şervanên Hêzên Sûriya Demokratîk QSD’ê de ji bin dagirkeriya DAIŞ’ê hat rizgar kirin jiyan her roj lê asayî dibe û xebatên ji nûve
rêxistinkirinê û ava kirina sîstemê bê navber didome.
Di çaçroveya hemleya avakirina komînan a ku ji aliyê Meclîsa Sivîl a Reqayê ve hate destpêkirin de, li taxa El-Nehda 14 komîn hatin avakirin.
Ji bo avakirina komînan herî dawî li taxê civînek ji aliyê meclîsê ve hate lidarxistin. Hevserokê Meclîsa taxê Hesen Xelîl û bi dehan şênî beşdarî civînê bûn.
Di civînê de Hevserokê Meclîsa taxa El-Nehda Hesen Xelîl diyar kir ku komîn yek ji stûnên avakirina civaka demokratîk e û gelê Bakurê Sûriyê wê bi îradeya xwe û di riya komînan re hemû pirsgirêkên xwe çareser bike.
Xelîl kar û xebatên komîn û komîteyên wê diyar kir û got ku pêwîste hevserokên komînê û endamên komîteyên wê erka xwe pêk bînin û li gorî berpirsiyariyê bin.
