Rayedarê Partiya Çep a Elmanya Jan Akin paşguhkirina Efrînê ji aliyê cîhanê de şermezar kir. Parlemantera heman partiyê Zakin Nastage jî diyar kir ku YPG’ê û YPJ li Rojava û Bakurê Sûriyê li ber hemû cîhanê de şer dikin.
Şandeyeke Elmanyayê ku ji parlemanterên Partiya Çep a Elmanya, rojnamevan, akademîsyen, sînameger pêk dihat duh serdana bajarê Qamişlo kir û rewşa herêmên Rojava û Bakurê Sûriyê ji nêz ve şopandin.
Parlemanter Zakîn Nastage di derbarê armanca serdana wan a Rojava de axivî û wiha got: “Armanc ji hatina me ya Rojava ew e ku em rewşa dawî ji nêzîk ve bişopînin, bi taybet rewşa koçberên di kampan de û rewşa welatiyên Efrînê ku neçarî koçberiyê hatine kirin û di kampên li herêma Şehba de hatine bicihkirin. Em hêvî dikin ku dewleta Elman alîkarî û piştgiriya xwe bi dewleta Tirk re ku hevkariya çeteyên DAIŞ’ê dike û bi riya wan êrîşî Efrînê dike, bi temamî rawestîne.”
Di derbarê rola jinan û hevgirtina gelan û pêkhateyan di şoreşa Rojava de Nastage wiha anî ziman: “Di cîhanê de şoreşeke weke ya Rojava pêk nehatiye ku têde rola jinan gelekî girîng e û pêkhateyan hevgirtina hev kirin û em ê jî alîkariya wê bikin.”
Nastage şervanên YPG’ê û YPJ’ê silav kir û wiha got: “Şervanên YPG’ê û YPJ’ê û hêzên leşkerî yên li Rojava û Bakurê Sûriyê li ber hemû cîhanê de şerê çeteyên DAIŞ’ê dikin.”
Rayedarê Partiya Çep a Elmanya Jan Akin jî li hember dagirkeriya dewleta Tirk paşguhkirina Efrînê ji aliyê cîhanê de şermezar kir û got, “Bi taybet bêdengiya dewleta Almanyayê ku alîkarî û piştgiriya Tirkiyê dike cihê şermê ye.”…ANHA
