Kordîneya Giştî ya Meclîsa Jinên Sûriyê Lîna Berekat diyar kir ku dewleta Tirk bi riya revandin, destdirêjî û kuştina welatiyan li Efrînê sûcên şer dike. Lîna wiha got, “Dewleta Tirk li Efrînê bi koçberkirina welatiyên Efrînê û bi cihkirina malbatên biyanî qirkirina etnîkî û guhertina demografîk pêk tîne.”
Kordîneya Giştî ya Meclîsa Jinên Sûriyê Lîna Berekat diyar kir ku Tirkiye bi riya revandin, destdirêjî û kuştina welatiyan li Efrînê sûcên şer dike, welatiyên Efrînê yên resen neçarî koçberiyê dike û li şûna wan biyaniyan bi cih dike.
Di çarçoveya helwestên li dijî dagirkeriya artêşa Tirk a dagirker û komên çete yên girêdayî wê li Efrînê, Kordîneya Giştî ya Meclîsa Jinên Sûriyê Lîna Berekat da xuyakirin ku Meclîsa Jinên Sûriyê bi çareserkirina aloziya Sûriyê bawer in û weke rêbaza çareseriyê diyalogê dibînin. Lîna Berekat banga cezakirina sûcdaran kir û diyar ku ew amade ne belgeyên girêdayî destdirêjiya dagirkeran radestî aliyên navnetewî bikin.
Lîna Berekat behsa destdirêjiya artêşa Tirk a dagirker û çeteyên wê kir û anî ziman ku ne tenê li Efrînê pêk tên, li hemû deverên Bakurê Sûriyê yên di bin dagirkeriya wê de ne pêk tên.
Lîna Berekat di berdewama axaftina xwe de diyar ku Meclîsa Jinên Sûriyê li dijî dagirkirina axa Sûriyê tevdigere û wiha got: “Piştî ku Tirkiye herêma Efrînê dagir kir, li Efrînê gelek kiryarên qirêj pêk anîn. Ên weke revandin, destdirêjî û kuştin û guhertina demografîk.”
Lîna Berekat destnîşan kir ku Tirkiye welatiyên Efrînê neçarî koçberiyê dike û li şûna wan welatiyên ji Xota, Idlib, gundewarên Dîmeşq, Humis û Hemayê bi cih dike û bi vê hewldana xwe guhertineke demografîk bi rengekî mezhebî û etnîkî pêk tîne û wiha dewam kir: “Ev siyasetên Tirkiyê li hemberî aştiya navxweyî û jiyana hevbeş ya pêkhateyên Sûriyê metirsiyeke mezin e. Kiryarên Tirkiyê li Efrînê di asta ‘sûcên şer’ de ne.”
Lîna Berekat behsa jêderên serjimariyên ku wan bi dest xwe ve anîne kir û got ku evan serjimarî ji rêxistinên mirovahî yên di Sûriyeyê de dixebitin wergirtine û hin belge Meclîsa Jinên Sûriyeyê bi xwe piştrast kirine.
Lîna Berekat di dawiya axaftina xwe de destnîşan kir ku Meclîsa Jinên Sûriyeyê parastina mafên jinên Sûriyeyê dike û hewl dide sûcdaran ceza bike.
Meclîsa Jinên Sûriyê roja 27’ê Gulanê di derbarê destdirêjiyên artêşa Tirk a dagirker û komên çete yên girêdayî wê li Efrînê de daxuyaniyek da û li gorî daxuyaniyê dagirkeran 119 jinên Efrînê revandine û malbatên 6000 çeteyan di malên Efrîniyan de bi cih kirine…ANHA