Dilîn EHMED
Duyemîn Mîhrîcana Zarokan a Çand û Hunerê bi tevlêbûna gelek komên stran, govend û şanoyê li Navenda Çand û Hunerê ya Mihemed Şêxo hate lidarxistin. Rêvebera komîteya çalakiya yên dibistanên Qamişlo Hêvîn Mihemed diyar kir ku ji bo nifşên nû hunera kurdî pêşbixînin xebatên çalakiyan dewam dikin.
Li Navenda Mihemed Şêxo a Çand û Huner ya bajarê Qamişlo 14’ê nîsana 2019 mihrîcana duyemîn ya xwendekarên dibistanên Qamişlo hat lidarxistin. Bi tevlîbûna 19 komên çalakiyên çand û hunerê pêşandanên weke şano, helbest, govend, stran, werzîş û hwd….. di mihrîcan de hat pêşkêşkirin.
ZAROK PÊŞENGÊ CIVAKÊ NE
Rêvebera Komîta Çalakiyên dibistanên Qamişlo Hêvîn Mihemed axivî û diyar kir ku ji despêka vekirina dibistanan ew amadekariyên xwe ji bo mihrîcanê dikin û got; “Ermaca me ya sereke ew e ku di rêya zarokan de çand û hunera kurdî pêşbixînin, ji ber ku wek tê zanîn zarok pêşengê civakên ne. Ji ber civak bi çanda xwe tê naskirin û bi taybet gelê kurd bi ziman, exlaq û cil û bergên xwe yên kurdî têne naskirin, divê li dibistanan li ser biranşê çand û huner baş were seknandin. ji ber ku wê zarok çanda ku têde mezin dibin, biparêzin.”
XWESTEKÊN FÊRBÛNA ÇANDA KURDÎ ZÊDE DIBE
Hêvîn di dewama axaftina xwe de, da zanîn ku sal bi sal mihrîcana zarokan pêşdikeve û got; “Festîvala îsal ji sala borî baştir bû ji ber ku zarokan hîn bêtir çanda xwe naskirin û li ser xebatên çandê têne perwerdekirin. Ya balkêş ew e ku dema em dest bi amadekariyên mihrîcanê dikin xwendekar bi coşeke mezin nêz dibin, em jî bi vê yekê gelekî kêfxweşdibin.”
DI RIYA ZAROKAN DE ÇAND WÊ WERE PARASTIN
Rêvebera Komîta Çalakiyên dibistanên Qamişlo Hêvîn Mihemed di dawiya axaftina xwe de behsa projeyên xebatên çalakiyên çand û huner yên li dibistanan kir û got; “Ji bo pêşketina xebatên çand û huner perwerdeyên çalakiyan li dibistanan tên berdewam kirin lê ji bo em hîn bêtir karê xwe pêşbixînin pêwîstiya me bi kesên pispor heye ku perwedeyê li ser çand û hunerê bide. Ji ber ku ne her kes dikare di karê çand û hunerê de bixebite.”