Ikbal BEDRAN
Endamên Koma Botan- Qamişlo ku beşdarî şahiya Newroza 2019an li Şehbayê bibûn ji rojnameya Ronahî re gotin: Me digot qey em ê moral bidin şêniyên Efrînê yên ku li Şehbayê li ber xwe didin, lê gelê Efrîn û Şehbayê bi tevlîbûn û rêxistinbûyîna xwe moral dan me hemiyan.
ME MORAL JI BERXWEDANÊ GIRT
Endama Koma Botan Nisrîn Mihemed ku bi navê Nisrîn Boran têye naskirin derbarê beşdarbûna xwe ya Newroza Şehbayê ev tişt anî ziman: Ez gelekî kêfxweş im ku beşdarî newroza Şehbayê bûm. Tabloya jiyana gelê me ya di nava çadir û xaniyên kavilbûyî de bandorek neyînî li min kir. Lê di roja Newrozê de me dît ku gelê Efrînê bi saya ramanên Rêber APO îro li ser lingan li ber xwe dide. Nisrîn Botan dewam dike û dibêje: Gelê ku rastî kirêtirîn cureyên komkujî, qirkirin û destdirêjiyan hatiye, li Şehbayê bi vîneke ji pola soza xwe ya vegera Efrînê bi lidarxistina Neweroza 2019an re dubare kir. Nisrîn balê dikişîne ser coş û moralên gelê Efrînê û dibêje: Yekem care têm Şehbayê. Sekna gelê me li Şehbayê cihê serbilindî û şanaziyê ye. Berovajî mebesta me ya moraldayînê me morla ji berxwedana gelê Efrînê girt.
EFRÎN ÇANDA XWE DIPARÊZE
Nisrîn Botan sekna çandî ya gelê Efrînê jî nirxand û ev tişt li gotinên xwe zêde kir: Gelê me di wê ferqa êrişên qirkirina çandî de ye. Faşîzma Tirk hewl da berî her tiştî resentiya Efrînê têk bibe. Lê îro li Şehbayê zêdeyî 300 endamên Çand û Hunera Demokratîk parastina çand û hunera Kurdî ya resen dikin. Gelê Efrînê girêdayî axê ye. Ji ber vê xisleta xwe li Şehbayê çanda xwe divejîne û dagirkeriyê têk dibe. Nisrîn Botan di dawiyê de got: Gelê ku girêdayî çanda xwe be ti dijminek nikare îradeya wî têk bibe. Rizgarkirin û parastina çanda Efrînê erka tevahî gelên Bakur û Rojhilatê Sûriyê ye.
RÊXISTINBÛN SERKEFTINÊ MISOGER DIKE
Ji aliyê xwe ve endamê Koma Botan- Qamişlo dengbêj Daniş Botan jî got: Çawa ku Newroz di wateya xwe ya rasteqîner de vejîn e, îro jî gelê Efrînê bi sekn û berxwedana xwe ji nû ve xwe divejîne û desthilatdaran têk dibe. Li Şehbayê hevoka Mazlûm Doxan “Berxwedan Jiyan e” zindî dibe. Daniş Botan ku bi kerwanên piştgiriyê re şahidê beşek ji qonaxa Berxwedana Serdemê bû wiha dewam dike: Îradeya ku li Şehbayê derketiye dewama xeta berxwedana li Efrînê ye. Gelê me di herdu qonaxên Berxwedana Serdemê de raberî dunyayê kir ku; dagirkerî çiqas hov dibe nikare vîna gelê me ya jiyana azad têk bibe. Baweriya me mezine ku wê gelê Efrînê bi fedayetiya xwe Newroza 2020an li Efrînê li dar bixe. Asta rêxistinbûyîna gelê Efrînê serkeftinê misoger dike.
PARASTINA ÇANDÊ PARASTINA AXÊ YE
Daniş Botan îşaret bi hewldanên qirkirina çandî yên li Efrînê li ser destê faşîzma Tirk û çeteyên wê têne meşandin kir û got: Gelê me afrîner e. Baş têgahaştiye zanebûna parastina çanda xwe. Di bin çi mercan de be, dikare çanda xwe biparêze. Parastina çandî parastina ax û civakê ye. Gelê me li gorî rastiyên Rêber APO xwe birêxistin dike. Berxwedana ku xwe bispêre vê çandê ti carî qir nabe.
Endamê Koma Botan Daniş botan di dawiya gotinên xwe de ev tişt jî anî ziman: Parastina çandê parastina rûmet, exlaq, şoreşgertî û hebûna me ye. Gelê Efrînê isbat kiriye ku; xwedî derketina li ramanên Rêber APO û xeta Şehîdên azadiyê gerantiya jiyana azad û bi rûmet e. Bi kelecan û qehremantiya gelê Efrînê rizgarkirina Efrînê nêz bûye.