Siyasetmedarên Kurd diyar kirin ku divê tevgerên siyasî yên Kurd li tevahiya Kurdistanê helwesta xwe li hember gefên Tirkiyê bikin yek û ji bo lidarxistina kongreya neteweyî ya Kurdistanî bixebitin.
Sekreterê giştî yê Partiya Çepgir a Demokratîk Salih Gedo diyar kir ku gelek armancên Erdogan ji êrîşan li dijî herêmê hene. A yekemîn têkbirina biratiya gelan û jiyana hevpar a gelê herêmê ye.
Gedo tekez kir ku ne ji berjewendiya dewleta Tirk e ku pêkhateyên herêmê rêveberiyeke demokratîk ya li ser bingeha biratiya gelan û jiyana hevpar ava bikin.
Gedo wiha dewam kir: “Gefên Erdogan li ser herêmên ku ji terorê rizgar bûne, xetereyek e. Ji ber wê divê Koalîsyona Navdewletî bi erkên xwe rabe û bersiveke tund bide gefên Tirkiyê. Ji ber ku QSD, YPG û YPJ beşek ji koalîsyonê ne.”
Gedo di dawiyê de bang li hemû tevgerên siyasî yên Kurdistanî kir ku li hember gefên Tirkiyê dengê xwe bikin yek û helwesteke cidî nîşan bidin.”
Hevserokê Partiya Aştiya Demokratîk a Kurdistanê Telal Mihemed destnîşan kir ku ji destpêka aloziya Sûriyê ve Tirkiye dixwaze rê li ber her guhertineke demokratîk li Sûriyê bigire.
Telal Mihemed wiha got: “Gefên Tirkiyê ne tenê li dijî parçeyek Kurdistanê ye, lê belê li dijî tevahiya xaka Kurdistanê ye. Ji lewre divê tevgerên siyasî yên Kurd wek erkeke dîrokî li hember gefan bisekinin. Ji ber ku projeya dewleta Tirk, projeyeke mêtinger e, vegera Împaratoriya Osmaniyan û dagirkirina xaka dewletên cîran û bi taybet dagirkirina Kurdistanê armanca wê ye. Li gel van hemûyan lidarketina kongreya neteweyî ya Kurdistanî pêwîstiyek e.”…ANHA