روناهي/ قامشلو ـ مساء الخير حبيبتي “مافي مساء النور قبل ما تخبرني شو جبتلي بعيد الحب!”، ولو حبيبتي في حدا ينسى هل اليوم، جبتلك شغلات وهدايا مختلفة عن البشرية كلها وأن ما عجبتك وقتها أحكي!، أول شيء جبتلك جرة غاز بتكفينا عشرين يوم وعشرة أيام بندبر حالنا كيف ما كان؛ وبلكي لوقتها يترحموا علينا جماعة المحروقات ويساووها بالشهر مرتين للمحروسة عما قريب بمناسبة عيد النفط بـ 30 شباط، يا ستي خدي هدية تانية كمان ربطة خبز سياحي بـ 1200 ل.س وكان مخبيها صاحب البقالية أحسن ما نتشنطط قدام البراكيات والأفران تبع الشعب، والسوبرايز الكبير يلي بيغنيكِ عن ألف دبدوب كبير ينباع بالسوق 150 ألف ل.س وأكثر، خط كهرباء 24 ساعة من المربع الأمني، “وليه كل هدول لالالا ما بصدق هاد الحب على أصولوووو وليه شو تحبني”، ولك وقفي لسا هاد فروج كمان 2 كيلو جبتهم 9300 ل.س تدينت وجبت قلت من 3 شهور ما أكلنا لحم؛ قلنا مو معقول عيد الحب وما نأكل لحم؟ ولك الكيلو يا بلاش صاير 4650 ل.س، وآخر شيء شوي وتصل سيارة المازوت ومعها 200 ليتر ولا موحايلا مازوت لا أبداً أبو ليتر 150 ل.س كيفني معك حبيبتي “وليه وليه شو تحبني طلعت عاشق ولا كل العشاق يا روحي”.
