روناهي/ قامشلو ـ مو معقول يتسمى المراجعين بقامشلو “مرضى”! لأنه المريض مستحيل يتحمّل هلأجواء بغرف الانتظار عند الدكاترة، بالفعل شيء يُفجع، لازم يسمّوك حجر صوّان…
والله ساعات بتضل واقف لأن ما شاء الله العيادة مليانة وما في كراسي تكفي الكل هذا غير إنو ما في تدفئة، لأن الدكتور فقير ما عندو حق أمبيرات، وكل هالمرضى وحق كل هالمعاينات وين يروح ما نعرف؟ طبعاً المعاينة غلّوها الأطباء وهيئة الصحة مثل العادة إذن من طين والتانية من عجين، الله وكيلك برد فوق ما تتصور وأغلب الأوقات الممرض عندو صوبيا لازق فيها والطبيب مكيف عالمكيف؛ أما المراجع… فعمرينك تتدفى أو لا؟ هاد غير مبدأ الخيار وفقوس بقصة الدور ما شاء الله فلان موصّى فيه من دكتور فلان وفلانة جايّة من فلان مسؤول… طيب أنتو الشعب راح تضلّوا هيك ساكتين يعني؟ والكل نازل فيكم يأكل حقكم طيب سجلوا موقف يا أخي مو أحسن ما تضلوا تنقوا بينكم وبين نفسكم.
