Hevberdevka HDK’ê Koçyîgît di Civîna Meclîsa Giştî ya 5’emîn a Serdema 8’emîn a HDK’ê de axivî û got, “Heta ku em li hemberî tecrîda li Îmraliyê dengê xwe bilindtir nekin, em nikarin qala wekhevî û azadiyê bikin.”
Civîna Meclîsa Giştî ya 5’emîn a Serdema 8’emîn a Kongreya Demokratîk a Gelan HDK’ê li Stenbolê li avahiya wê pêk hat. Hevberdevkên HDP’ê Onûr Hamzaoglû û Gulistan Kiliç Koçyîgît û pêkhateyên HDK’ê tevlî civînê bûn.
Hevberdevka HDK’ê Gulistan Kiliç Koçyîgît diyar kir ku divê ew herî zêde hay ji Girtîgeha Îmraliyê hebin û got, “Beriya Rewşa Awarte hevdîtina bi Ocalan re dihat astengkirin, niha jî derket holê ku cezayê dîsîplînê li wî hatiye birîn. Bi hincetên pûç hevdîtin tên astengkirin. Me berê gelek caran got, heta ku tecrîda li Îmraliyê ranebe, heta ku pergala hiqûqî ya Îmraliyê neyê teşhîrkirin û deng ji tecrîdê re neyê derxistin, mirov nikare qala wekhevî û azadiyê bike.”
BANDORA TIRKIYÊ YA LI SER ÇETEYAN
Koçyîgît qala meseleya Îdlîbê jî kir û got, “Diyar e ku heke şerek li wê derê pêk were, ew ê trajediyên mezin pêk werin. Tê dîtin ku Tirkiye ji bo çete dev ji çekên xwe berdin û herin herêmeke tampon îro bûye welatekî garantor. Gelo ev bandora Tirkiyê ji ku tê? Divê em li vî tiştî bipirsin.”
