Hemza Sêvo/ Qamişlo
Desteya Çandê ya Kantona Cizîrê, bi durşmeya “Em bi rengê xwe jiyanê dixemilînin” û tevlîbûna 54 şêwekaran yekemîn Pêşangeha Şêwekariyê li Navenda Çand û Hunerê ya Mihemed Şêxo ya Qamişlo dest pê kir.
Bi armanca pêşxistina asta şêwekarî û şêwekarên kantona Cizîrê, pêşangeheke tabloyên hunerî bi dirêjahiya 3 rojan ji aliyê Desteya Çandê ve bi amadebûna endam û nûnerên Rêveberiya Xweser, hunermend, şêwekar û rewşenbîran hat destpêkirin.
Berî ku tablo werin pêşandan, hemû kesên amade tevlî xuleyeke bêdengiyê bûn. Piştî wê bi navê Rêvebreiya Xweser Mariya Aho girêdayî lidarxstina pêşangehê wiha anî ser ziman: “Bi darxsitina vê pêşangihê, soza afrîneriya hunerî tê berdewamkrin. Ev yek jî dikeve ser milê kesayetên afrîner. Em vê pêşengehê bi dilxweşî pîroz dikin û ji hemû destekdayînên ku dikevin xizmeta hunera civakê re her tim amade ne.” 
Piştî wê jî endamê komîteya amadekar a pêşangehê, Ebdilmecîd Xelef derbarê pêşangehê de wiha got: “Me têkilî bi şêwekar û saziyên xwe yên hunerî re kirin û di encamê de 54 kesên şêwekar tevlî bûn. Armanca me ji Pêşangeha Şêwekariyê ew e ku em bibin destekek ji şêwekearên kantona Cizîrê re. Herwiha nasnameya civaka xwe bi riya hunerê bidin xuyakirin. Ji ber ku em deyndarên şêwekariya xwe ne, em ê her tim hewldanên xwe dikin ku bi rengekî estetîk, rih û şêweyê jiyana civaka xwe bidin pêşandan.”
Piştî vê axaftinê, wêneyên şêwekaran hatin pêşandan. Hate diyarkirin ku tabloyên hunerî yên hatin pêşandan girêdayî xwezayê, jina kurd, dayîk, hunera şoreşgerî, welat û hwd… bûn. Hêjayî gotinê ye ku nêzî 30 jinên şêwekar tevlî pêşangehê bûne.
Pêşangeha Şêwekariyê her sê rojan ji seet 10’ê sebehê heya 2’yê piştî nîvor, hem jî ji 4’ê êvarê heya 8’ê êvarê didome. Di roja 3’an û dawî de li gel pêşandana tabloyan, wê ahengên hunerî ji hêla hunermend Sumeya Muhemed, Danîş Botan û Şêxmûs Doxan ve bên lidarxistin. Herwiha di seet 5’an bidawî dibe û wê di roja dawî de sipasname li hemû şêwekaran werin belavkirin.
