Dîlan Mulhim/Qamişlo
Rêxistina Nûdem a Amadekirin û Geşedanên Mirovî ya Astengdaran ve bi daxuyaniyekê bernameyê xwe ji bo Roja Cîhanî ya Astengdaran eşkere kir.
Îro Rêxistina Nûdem a Amadekirin û Geşedanên Mirovî ya Astengdaran bi boneya Roja Cîhanî ya Astengdaran ku 3’ê Berfanbarê ye daxuyaniyek da. Herwiha ji bo vê rojê bernameyê xwe eşkere kir.
Di daxuyaniyê de hemû rêxistinên civaka sivîl beşdar bûn, herwiha daxuyanî bi zimanê erebî ji aliyê Rêvebera Rêxistina Nûdem, Daviyan Mehmûd ve hate xwendin.
Daxuyanî wiha hate destpêkirin: “Her sal di 3’ê Berfanbarê de, cîhan bi giştî ji bo astengdara pîrozbahiyê dike. Ev roj girîngiya destekdayîna kesên astengdar û mafê wan di civakê de nîşan dide. Ev roj banga cîhanê ji bo hişyarbûna maf û hewcedariyên taybet ên astengdaran dike. Hem jî bi armanca zêdekirina derfetên wan ji bo perwerde, kar û beşdariya civakê. Armanc ji vê rojê ronîkirina kêşeyên ku astengdar pêre rû bi rû dibin, çi li ser asta kesan yan civakê be. Di heman demê de ev roj derfetekê ji bo pîrozkirina destkeftiyên kesên astengdar di warên cûr bi cûr de û pêşbirna pernsîbên derfetên wek hev nîşan dide.”
Daxuyanî wiha hate berdewamkirin: “Di vê rojê de em bang li hemû kesan dikin ku destên xwe bidin hev ji bo çakkirina jiyana kesên astengdar, bixebitin û her kesî tewşîq bikin ku piştgirî û hêzê bidin wan, da ku karibin xwe weke her mirovekî di nava civakê de bibînin. Herwiha em hemû berpirsyar in derbarê avakirina civakeke ku bi çavê kêmaniyê li kesên astengdar nenere.”
Di dawiya daxuyaniyê bernameya xwe ya dema pêş bi dirûşmeya “Bi Vîna xwe em ê hêviyê biafirînin” wiha eşkere kir:
Avakirina giropên perwerdehiyê bi serenavên cûda. Serdanên qadan ji bo kesên astengdar. Herwiha xelatkirina hin kesên astengdar. Lidarxistina çalakiyan li bajarên ku Rêxistina Nûdem lê dixebite, mîna Hesekê, Kampa Serêkaniyê, Kampa Waşûkanî û Qamişlo. Vekirina navendekê li bajarê Helebê, Kampa Berxwedan a li Şehba. Wê çalakiyên bidawîkirina bernameyê li Qamişlo bên lidarxistin.
