Jinên ku beşdarî yekemîn konferansa HPC’ê ya li Kobanê bûn diyar kirin ku rola sereke ya jinan parastina civakê ye û wiha gotin, “Jin bi hêz,îrade, fikir û felsefeya xwe divê parastina xwe û civaka xwe bike. Erka me ew e ku em hemû jinên civakê li ser parastinê perwerde bikin.”
Jinên ku beşarî konferansê bûn di derbarê 1. Konferansa xwe de û girîngiya parastinê anîn ziman û destnîşan kirin ji bo ku civakeke rast were ava kirin, divê jin bingeha parastina wê civakê be.
Hêzên Parastina Civakê (HPC) ya Kantona Kobanê duh 1’emîn Konfransa xwe li darxistin. Jinên ku beşdarî konferansê bûn derbarê girîngiya konferansê de nêrînên xwe anîn ziman.
DIVÊ EM PARASTINA XWE XURT BIKIN
Rohilat Mustefa Konferans pîroz kir û wiha got: “Armanca me ji vê konfransê ew e ku em parastina rewa xurtir bikin û rêya parastinê li pêşiya jinan vekin da ku xwe, mala xwe, taxa xwe û welatê xwe biparêzin. Ji bo vê jî em îro dibînin ku jin bi hejmareke mezin tevlî vê konfransê bûne.”
JIN WÊ CIVAKÊ BIPARÊZE
Rûjîn Salim ya ji bajarê Derayê ye wiha got: “Îro jin ji %50 tevlî konfransê bûne. Armanca me ew e ku em cihê xwe di nava parastina welatê xwe de bigirin. Him parastina xwe, parastina îdolojiyê, siyasetê û civakê jî. Îro jin bingeha avakirina civakeke parastî ne. Jin bi hêz,îrade, fikir û felsefeya xwe divê parastina xwe û civaka xwe bike. Ji bo vê jî em dibêjin divê her kes erka parastina welatê xwe bike û bi taybet jî jin.”
EM Ê JINAN PERWERDE BIKIN
Herî dawî Mizgîn Ebdilqadir jî wiha axivî: “Weke jinên HPC`ê cih girtina di nava qada parastinê de gavek bû ku em tirsa bi salan di dilê jinan de bişkînin. Me perwerde dît û me çek jî hilda. Ev yek hîşt ku em bibin wêneyek ji jinên civakê re ku ew jî bi me bandor bibin û ew jî xwe li ser vî bingehî bi rêxsitn bikin. Soza me jî ewe ku ew jinên ku hîna di malan de ne wan li ser van esasan perwerde bikin.” …JINNEWS
