Kongra Star û Meclîsa Jinan a PYD’ê yên bajarê Helebê ji bo rakirina tecrîda li ser Rêberê Gelê Kurd Abdullah Ocalan û azadiya wî 2 daxuyaniyên cuda dan. Di her du daxuyaniyan de bang li rêxistinên mirovî û hiqûqî û Neteweyên Yekbûyî hate kirin ku bi berpirsyariyên xwe rabin û rê li pêşiya destdirêjiyên Tirkiyê bigirin.
Di çarçoveya qonaxa sêyemîn a hemleya “Em ê sîstema Îmraliyê hilweşînin û bi rêberê xwe re azad bijîn” de ya ji bo azadiya Rêberê Gelê Kurd Abdullah Ocalan ku Kongreya Star daye destpêkirin, 2 daxuyanî hatin dayîn.
Endamên Kongreya Star ên bajarê Helebê û endamên jin ên komînan li pêşiya navenda Weqfa Jin a Perwerde û Pêşxistina Hişmendiyê kom bûn û alên Kongreya Star û wêneyên Rêberê Gelê Kurd Abdullah Ocalan bilind kirin. Endama Buroya Têkiliyên Dîplomasî ya Kongreya Star a bajarê Helebê Leyla Xalid daxuyaniyek xwend.
Di heman çarçoveyê de endamên Rêxistina Jinan a Partiya Yekitiya Demokratîk (PYD) ya bajarê Helebê daxuyaniyek da. Daxuyaniya PYD’ê jî ji aliyê Fatme Qunyekî ve hate xwendin.
Di her du daxuyaniyan de hate gotin ku dewleta Tirk li dijî gelê Kurd destdirêjiyên herî qirêj pêk tîne û ji aliyekî din ve jî tecrîda xwe li ser Rêberê Gelê Kurd Abdullah Ocalan didomîne.
Di daxuyaniyan de hate gotin ku tu carî kesayetên wekî Rêber Ocalan nayên girtin û wiha hate gotin: “Fikra Ocalan di nava gelên bindest de belav dibe.”
Di daxuyaniyan de hate gotin ku hêzên komploger xwestin bi girtina Ocalan rêgezên mirovî û exlaqî têk bişikînin, lê bi saya felsefeya Ocalan bi milyonan şopdarên Ocalan derketin. Di daxuyaniyan de her wiha hate gotin ku êrîşa artêşa Tirk li dijî Şengalê nîşana têkçûna wê ye piştî ku hemû siyasetên wê li Sûriyê hatin têkşikandin
Di her du daxuyaniyan de tecrîda li ser Rêberê Gelê Kurd Ocalan bi tundî hat şermezarkirin, her wiha bang li rêxistinên mirovî, hiqûqî û Neteweyên Yekbûyî kirin ku bi berpirsyariyên xwe yên mirovahî û exlaqî rabin û rê li pêşiya destdirêjiyên dewleta Tirk bigirin. Daxuyanî dirûşmên wekî “Bê serok jiyan nabe” û “Jin jiyan azadî” bi dawî bûn.
Jinan ji bo azadiya Ocalan daxuyanî dan
