Lîloz Hisên/ Qamişlo
Hevgirtina Rewşenbîrên Rojavayê Kurdistanê(HRRK)`ê bi drûşmeya ‘ Em bi peyama xwe ya rewşenbîrî bi hezkirinê berdewam dikin, bi srûdên axê bi tembînameyên cangoriyan dixemilînin’, 10`emîn Mihrîcana Rojava ya Çand û Hunerê, li navenda xwe ya bajarê Qamişlo li dar xist.
10`emîn Mehrecana Rojava ya Çand û Hunerê bi tevlîbûna nêzî 130 rewşenbîran, deste, dezgehên hunerî, nivîskar û helbestvanan dest pê kir. Mehrecan wê 10 rojan berdewam bike, tê de panel, şano û şevbuhêrkên hunerî û çandî bên li dar xistin.
Mihrîcana Rojava ya Çand û Hunerê bi deqeyeke rêzgirtin ji bo giyanê şehîdan dest pê kir. Piştre bi navê Desteya Çandê ya kantona Cizîrê, komîteya amadekar ya mehrecanê, Markêta Zeîm, Yekîtiya Rewşenbîrên Kantona Cizîrê, Yekîtiya Nivîskarên Kurdistana Sûrî, Yekîtiya Nivîskarên Kurd li Sûriyê, Mamoste konê Reş, Mamoste Xalis Misewr û Mihemed Ellî Ebdê axaftin hatin kirin.
Di axaftinan de vekirina vê mihrîcanê li HRRK û hemû beşdavanan hate pîroz kirin, ku serkeftina xwe di dirêjahiya 10 salan de, bi hemû hêzê û çalakiyên xwe yên cûr bi cûr berdewam kir.
Di axaftinan de hate tekezkirin ku bi hêviyên mezin ew ê karbin bi rastî xwedî li zimanê xwe derkevin û çanda xwe biparêzin û wiha hate gotin: “Dema mirov dibêje çand û huner giyan, hebûn û nasnameya jiyanê ye, jiyana ku bi sedê salan hatiye windakirin, mehercana ku îro tê li dar xistin, dîroka me ya windayî tîne meydanê bi saya nivîskar û rewşenbîran ku karçbûnxwdî li çand û hunera kurdî derkevin. Her çiqas civak di aliyê hişmendî û çandê de bilind be ewqasî wê civak bi pêş dikeve.”
Piştî bidawîbûna axaftinan, ji hêla hunermend Kawa Kalê ahengeke muzîkî hate lidarxistin.
Bi vekirina pêşengeha hunermend Hikmet Ibrahîm, bi pêşkêşkirina 62 tebloyên ku bi destan hate çêkirin, çakaliya vekirinê ya Mihrîcana Rojava ya Çand û Huner bi dawî bû.
Hêjayî gotinê wê di roja dawî xelata HRRK’ê ya Afirandinê were ragihandin. Ev xelat wê ji aliyê kesekî bazirgan ve yê bi navê Telal Elşêx were dayîn û temenê wê jî hezar dolar e.
