Li kampa Şehbayê zêdetirî 100 malbat dijîn. Tu rêxistineke navneteweyî serdana vê kampê nekiriye. Rêveberiya kampê zehmetiyan di peydekirina xwarinên zarokan û pêşkêşkirina alîkariya tenduristiyê de dikişîne.
Rêveberiya Xweseriya Demokratîk li kantona Şehbayê di tebaxa 2016’an de li başûrê gundê Keştar ê girêdayî navçeya Şêrawa li başûrê kantona Efrînê, Kampa Şehbayê ava kir.
Beriya êrîşa dewleta Tirk li ser Efrînê hejmarek koçber li kampa Rûbar li rex kampa Şehbayê dijîn. Lê piştî êrîşa dewleta dagirker a Tirk li ser Efrînê pêk hat, koçberên kampa Rûbar neçar man careke din koçberî kampa Şehbayê bibin û vê yekê jî barê kampê girantir kir.
Endamê rêveber ê kampa Şehbayê Mihemed Dîbo wiha got: “Ti rêxistinan heta niha serdana kampê nekirine û alîkarî nedane.”
Rêveberiya kampê hewl dide tevî kêmderfetan pêdiviyên jiyanê ji zêdetirî 100 malbatan re peyde bike. Di kampê de 110 kon li ser firehiya qadeke 4 hektar hatine danîn. Li kampê Şaredariya Gel a Şehbayê û Heyva Sor a Kurd li gor derfetên xwe alîkariyê didin koçberan.
Lê kampê di warê xizmetên tendurustî, kêmderfetî û şîrên zarokan de zehmetî tên kişandin. Koçberên li kampê bang li sazî û rêxistininên mirovî yên navnetewî kirin ku alîkariya wan bikin…ANHA
Jiyana koçberan di kampan de zehmet dibe
