Ebdulselam Ehmed diyar kir ku Rêveberiya Xweseriya Demokratîk a Rojava hebûna xwe ya siyasî û leşkerî îsbat kir. Ehmed bi bîr xist ku dema behsa çareserkirina aloziya Sûriyê bê kirin, divê Rêveberiya Xweser neyê paşguhkirin.
Ji rêveberên Buroya Têkiliyên Giştî ya Tevgera Civaka Demokratîk (TEV-DEM) Ebdulselam Ehmed destnîşan kir ku piştî Rêveberiya Xweser hat avakirin û şûnde hemû ol, pêkhate û neteweyan di nava xwe de dihewîne û hemû pêkhateyan bi hev re hevpeymana civakî ya Rêveberiya Xweser nivîsand.
Ehmed bi bîr xist ku bi saya Rêveberiya Xweseriya Demokratîk ewlehî û aramî li herêmên Rojava pêk hat û hemû komên çete DAIŞ ên ku hewl didan îradeya gelan têk bibin, hatin têk birin û.
Ehmed bal kişand ser rola QSD`ê ya rizgarkirina piraniya Bakurê Sûriyê ji çeteyan û got li wan herêman meclisên herêmî û Rêveberiya Xweseriya Sivîl hatin îlankirin.
Ehmed girîngiya Rêveberiya Xweser ji bo çareserkirina aloziya Sûriyê bi bîr xist û wiha got: ʺDema behsa çareserkirina aloziya Sûriyê were kirin, dive Rêveberiya Xweseriya Demokratîk û Sivîl neyên paşguhkirin.ʺ
Ebdulselam Ehmed di dawiya axaftina xwe de ev tiş anîn ziman: ʺLi herêmên di bin kontrola muxalefetê de, hemû projeyên wê têk çûn û li wan herêman şerê mezhebî dest pê kir û gihişt asta şerê navxweyî. Lê li herêmên Rêveberiya Xweseriya Demokratîk jiyana hevbeş a xwe dispêre qebûlkirina aliyê din pêk hat. Em hêvî dikin ku projeya Rêveberiya Xweseriya Demokratîk li tevahiya herêmên Sûriyê were bicihanîn.ʺ…ANHA
