Weke hemû beşên civakê zarok jî para xwe ji hovîtiya dagirkeriya dewleta Tirk girtin. Zarokên Efrînê yên ku li herêma Şehbayê dimînin bi xebatên hunerî, lîstik û dilpakiya xwe vê hovîtiyê vedibêjin.
LÎSTOKÊN ME
JÎ KUŞTIN!
Şevbîn Oso, zaroka ji gundê Qurtqulaq ê girêdayî navçeya Şera ku li kampa Serdem dimîne dagirkerî wiha rave kir: Rojane balafirên cengê ser me de difiriyan. Mal û gundên me rûxandin. Dibistanên me hilweşandin. Gelek zarok kuştin û koçber kirin. Şevbîn bi bîrî behsa lîstokên xwe kir û got: Pêlîstokên me jî kuştin. Em jî dixwazin nola hemû zarokên dunyayê bê tirs bijîn. Em ji Efrînê hez dikin. Hêviya min ew e ku di demeke kin de vegerim warê xwe û ji nû ve bi hogirên xwe re tevî lîstokên xwe bilîzim. Şevbîn Oso dawiyê de bi dengê xwe yê zelal strana Berxwedana Serdemê ji me got û hestên xwe bi gotinên stranê ji me re vegot.
STUYÊ MIRÎŞKAN
JÎ JÊKIRIN!
Zaroka yazdeh salî navê Evîn Hisên a ji gundê Çeqelê Cûmê yê girêdayî navçeya Cindirêsê jî got: `Min gelek bîriya Efrînê kiriye. Her rojek di ser me re diçe bi qasî salekê dirêj e. Çi dibe bila bibe, ez dixwazim bi pirtûk, heval, cîran û hogirên xwe re li ser axa Efrînê bijîm. Em ê ji nû ve dibistanên xwe ava bikin. Evîn jî mîna hemtemenên xwe talanî û hovîtiya dewleta dagirker a Tirkiyê ji bîr nekiriye û dibêje: Em ê li van deverên berxwedanê bi riya stranên xwe dagirkeriyê têk bibin. Li me zarokan ma be, wê dagirkerî biherife.
Dawiyê de herdu zarokan bi van gotinan hestên xwe wergerandin: “Em nûpelên Efrînê, ji wan baxên evînê. Ji wan dibistanên me, banga me li cîhanê. Rûvî êrişî me dikin, warê me talan dikin. Kevok û mirîşkan jî, stuyê wan jêdikin. Dibistan wêran kirin, mal jî dûman kirin. Ka lîstokên zarokan, ji destê çûkan birin.”
Şîlan XOCE
