Birûc Resûl/Qamişlo
Hevserokê TEV-Çand a Bakur û Rojhilatê Suriyê Xelîl Tehlo diyar kir ku armanca wan ew e ku bi hemû pêkhateyên gelê xwe hunera xwe bi pêş bixin û pêwîstî heye ku ew vê lehengiya ku pêşiya şoreşa Rojava vekir, li cîhanê bidin naskirin.
Komîna Şanoyê ya TEV-ÇAND’ê, cara yekemîn di dawiya sala 2023’an de starta serlêdana teksên şonoyê dabû. Ji wê demê heya 15’ê Adara 2024’an li ser asta herêmên Bakur û Rojhilatê Sûryeyê de bi giştî 23 teksên ku bi zimanê Kurdî (zaravayê Kurmancî) û yên Erebî ketin pêşbirkê.
Komîna Şano ya TEV-ÇAND’ê, bi dirûşmeye ‘Şano Gewhera Jiyanê ye’ ahenga pêşbirka yekemîn ya Deqên Şanoyê ya sala 2024’an, li Navenda Mihemed Şêxo ya Çand û Hunerê ya bajarê Qamişlo li dar xist. Merasîma xelatdayînê bi tevlîbûna nivîskar, rewşenbîr, hunermed û gelek kesan hat li dar xistin.
Her wiha 2 şanoyên bi navên “ Yan Ez, Yan Em” û “Wê Werin” hat pêşkêşkirin. Herî dawî ji 23 teksên şanoyê ku ketibûn pêşbirkê de nivîskar Elaa Ebdullah bi teksa şanoya bi navê “Reş û Spî “ bû yekemîn, nivîskar Caber Hebîb bi teksa şanoya bi navê “Qêrîna Axê” ku bi Zimanê Erebî nivîsandibû bû duyemîn û nivîskar Umran Yûsiv jî bi teksa şanoya bi navê “Dînistan” bû sêyemîn û 5 cildên parêznameyên Rêber Abdullah Ocalan hatin dayîn. Her wiha di pêşbirkê de ji xwediyê teksên çaremîn, pêncemîn û şeşemîn jî spasname hat dayîn. Di vê çarçoveyê de Hevserokê Tev-Çand a Bakur û Rojhilatê Suriyê Xelîl Tehlo ji Rojnemeya me re axivî.
Demên hazirtiya pêşbirkê
Xelîl tehol bal kişand ser pêşbirke şanoyan a sala 2024`an û wiha got: “Ev nêzî 6 mihan li ser asta Bakur û Rojhilatê Suriyê hazirtî ji bo pêşbirka şano hat kirin. Her wiha nêzî 3 mehan me ji nivîskaran re dem danî ku nivîsên xwe pêşkêş bikin û tevlî pêşbirkê bibin, di heman demê de qomîte nerxandinê jî hatin avakirin, ev qomîte jî li ser asta Bakur û Rojhilatê Suriyê bû, ji 5 kesan pêkhat. Bi giştî 23 şanoyên nivîsî ji me re hatin û li ser her nivîsekê jî nirxandin hat kirin, piştî nirxandinan 3 nivîs hatin hilbijartin ku li ser asta yekemîn, duyemîn û siyemîn ku werin xelat kirin. Ev nivîs jî bi zimanê kurdî û erebî hatine nivîsandin, lê nivîsên bi zimanê kurdî zêdeti re. Her wiha spasname jî ji bo wê ji bo komîteya nirxandinê û hin nivîskar û rewşenbîran re wê were dayin.”
Asta nivîsa zimanê kurdî
Xelîl Tehlo di dawiya axaftina xwe de wiha got: “Armanca me ji vê pêşbirkê ew e ku asta nivîsandina şano li Bakur û Rojhilatê Suriyê zêde bibe û pirtûkên bi zimanê kurdî zêdetir û astekî bilind bin. Yanî her dem nivîs bi zimanê erebî zêdetir ji me re dihat, lê di vê salê de me dît ku asta nivîsandina zimanê kurdî zêdetir buye. Her wiha bi van nivîsan em bikaribin şoreşa Rojava ji cîhanê re bidin naskirin û bikeve dîrokî de.”
