Ayşa Silêman/ Qamişlo
Endama Meclisa Giştî ya PYD’ê Ahîn Elî diyar kir ku di Newroza 2024’an de qonaxa yekem ji pêngava ji Rêber Apo re azadî û ji pirsgirêka kurd re çareserî giha lûtkeya xwe û niha jî qonaxa duyem dest pêkir, divê qonaxê de berxwedan û gelecana gel zêdetir bûye.
Di derbarê destpê kirina Qonaxa Duyem ji Pêngava Cîhanî ya ‘Ji Rêber Apo re azadî û ji pirsgirêka kurd re çareserî’ Endama Meclisa Giştî ya PYD’ê Ahîn Elî bersiva pirsên Rojnameya me da û Hevpeyvîn wiha bû:
–Qonaxa yekem a pêngavê derbas bû, Newroz bû lûtkeya qonaxa duyem, hûn mesajên ku gel di Newrozê de dan ji bo pêngavê çawa dinirxînin?
Di serî de Newroza 2024’an li Rêber Apo, berxwedêrên zindanan, azadîxwazên û li Şoreşa jinê pîroz dikin. Newroza îsal ne wek ya tu salan bû, ev Newroz temsîliya Kawayê hemdem dikir, temsîliya
berxwedanî û qehremantiya Kawayê Hesinkar heya roja îro dikir. Kelecan û coşa di hundirê civakê de ne normal bû, tevî ku meha remezanê bû jî lê eşqa civakê ji vê rojê re derket holê. Girêdana wan bi Rêber Apo re di heman demê de daxuyaniya HPG’ê jî coşek gelek mezin çêkir. Hat isbatkirin ku îradeya civakê ji her teknîk û cûreyên şerê cîhanê xurtire. Di Newrozê de jî hat dîtin ku tevî rewşa avhewayê ya neguncaw jî lê dîsa gel girêdana xwe bi Rêber Apo re nîşan didan. Di Newrozê de gel di got ku azadiya Rêber Apo azadiya civakê ye. Rêber Apo 25 sal di bin tecrîdê de tekoşîn û berxwedaniyeke bêhempa dide meşandin. Ji bo vê yekê divê gelê wî jî xwedî lê derkeve. Bi vî rihî dihat diyarkirin ku gel di hemû axaftinên xwe de Newroza 2024’an li Rêber Apo pîroz dikirin. Dirûşmeya pêngava me bû dirûşmeya Newrozê jî, bi vî awayî girêdana gel bi Rêber Apo re hat xuyanî kirin, herwiha di 15’ê Sibatê de herikanda civakê ji qadan re êdî ji hemû cîhanê re dibêjin; tu kes nikare îradeya me bişkîne û me ji Rêber Apo qut bikin. Herwiha Rêber Apo parçeyek ji me ye û bi me re jiyan dike, dibe ku di milê fîzîkî de ne bi me re be, lê di rastiya xwe de di milê hest, hizrandin û rastiya xwe naskirina me de bi me re ye. Mesajên gel jî ev bûn, gelek aliyan digotin ku Rêber Apo nasnameye, berxwedane û rûmete, bi dirûşmeyên wisa dayîkan hestên xwe didan xuyanîkirin û dayîkên şehîdan digotin ku em şehadeta zarokên xwe li Rêber Apo pîroz dikin. Bi vî awayî tê xuyanîkirin ku kes nikare roja me tarî bike, bi vîna gel û berxwedaniya Rêber Apo wê tekez azadî misoger bibe.
-Piştî Newrozê û şûnde ji bo vê pêngavê wê çi were kirin û çi di pêşiya komîteyê de heye ku pêwîste were kirin?
Pêngava me wê berdewam be heya ku em azadiya fîzîkî ya Rêber Apo bidest bixin. Ji ber ku em wek insiyatîf nabînin ku Rêber Apo ne azade, yê ku ne azad em in. Rêber Apo di girtîgeheke piçûk deye û em jî di girtîgiheke mezin de ne, dijmin lîstokên mezin li ser me dimeşîne û şerê birakujiyê û olan pêş dixe. Herwiha kampaniya imzeyan jî dest pê kiriye, armanca me ew bû ku 3 mîlyon imzeyan kom bikin lê heta niha zêdetirî 3 milyonî gihiştiye û wê berdewam bibe heya 4’ê Nîsanê. Bi rêya imzeyan gel dixwaze tekez bike ku kes nikare me ji Rêber Apo qutbike û em bê Rêber Apo nikarin jiyan bikin, mînak; gava di hundirê komînan de em digerin ji bo imzeyan, gel dikeve nîqaşan û dibêjin ji bo Rêber Apo imzeyek hindike. Di heman demê de jinên pêkhateyên ereb têkoşînekî bê hempa ji bo Rêber Apo dixwazin bikin, heyanî di milê imzeyan de jî rêjeya kurdan û erban hema bû wek hev, di heman demê de divê pêngavê de Suryan, Aşûr, Kildan, Tirkmanan, gelê Siwêda, Laziqî û Şamê jî cihê xwe girtin. Kampaniya imzeyan ji asta herêma Bakur û Rojhilatê Sûrî derket, bû li ser asta Sûrî bi giştî û ev hemleyê wê encameke baş bigre. Hêvîdarim cihê ku wê ev imze jê re werin şandin, bi erkê xwe rabin û berpirsiyatiya xwe li hember vê civaka ku xwesteka wê azadiya Rêber Apo. Di heman demê de xwestekên wê li gor zagonên cîhanê ku mafê hêviyê li ser Rêber Apo were pêkanîn û tecrîd were şikandin û bikaribe malbata xwe bibîne û ji nû ve dadgeheke navnetewî were çêkirin. Herwiha li kêlek vê pêngavê wek insiyatîv nameyek hatiye hazirkirin, ew name bi zimanê ingilîzî hatiye nivîsandin û wê ji 12 rêxistinên bingehîn re were şandin. Piştî ku serjimarî ji bo imzeyan were çêkirin û name bê şandin, pêwîste ku di rojbûna Rêber Apo de tekoşîneke mezintir were kirin di nava yekîtiyan de û em ê hewil bidin di nava wan de rêxistinan bidin çêkirin. Divê hemû alî bi erkê xwe rabin ji komînê bigre heta bighêje asta herêma Bakur û Rojhilatê Sûrî û xwedî li Rêber Apo derkevin. Bi taybet wek jin divê em nasnameya xwe biparêzin ji ber yê ku hiştiye ku hebûna jin hebe Rêber Apo ye. Em ê guftûgoyên bi vî rengî bidin meşandin, di heman demê de jî pêngava xwendina her pênc pareznameyên Rêber Apo û bi taybet ya 5’emîn wê berdewam be, da ku her kes di nav fikirê Rêber Apo de zindî jiyan bike, bi vî awayî wê mîtîng, çalakî, panêl li dar bikevin.
-Qonaxa duyem çawa birêve diçe, heta ku kar û xebatên vê pêngavê encam bigre pêwîste çi were kirin?
Piştî meşa li Kolin qonaxa duyem dest pê kir, di heman demê de mirov dikare di vî alî de binirxîne. 4’ê Nîsanê û 1’ê Gulanê jî li pêşiya me ye, bi taybet ev çalakî wê çawa bin û pêwîste çawa were meşandin. Ji bo pêngavê îsal hat diyarkirin ku çiqasî herikandin çêbû, di heman demê de jî dirûşmeya 8’ê Adarê jî ji bo tecrîdê cihê xwe girt û bi hezaran jin di qadan de şahiya 8’ê Adarê li Rêber Apo pîroz dikirin. Di heman demê de di destpêka Newrozê de me nirxandinên xwe nîşandan û civakê jî cihê xwe têde girtin, niha jî ji bo Rêber Apo imze û name tên amade kirin, ev yek rêvebirinek di milê insiyatîfa gel bi xwe de tê kirin. Insiyatîfa gelêrî bi xwe vî karî dide meşandin. Encama ku ev çalakî wê bigre wê bandorekî li tevahî cîhanê hebe. Ji ber ku hest û hizrên ku Rêber Apo bi civakê re parvekiriye, civakeke birêxistinkirî daye avakirin. Divê 4’ê Nîsanê jî bi rih û heyecana 8’ê Adarê û Newrozê 4’ê Nîsanê jî were pîroz kirin û bibe roja bilind kirina têkoşîn, berxwedê û qehremantiya civakê.