Ahmed Aktaş
Li ser hilbijartinên 14’ê Gulanê gelek şîrove hatin kirin. Hinek hinekan serkeftî û hinekan jî binkeftî nîşan dide.
Li gorî tê xuya kirin, gelo mirov tu alî ne serkeftî û ne jî binkeftî bibîne rastir nîne?
Jiber ku di hemû hevbendiyan de, him aliyên serkeftî him jî yên binkeftî hebûn. Lewma, gelo mirov di zikhev de bêje “hemû hevbendî derkuşkî ketin” ne rastir e?
Ka em hinekî bala xwe bidin gotin û helwestên wan.
Hevbendiya MILET dibêje; hevbendiya CUMHUR bi ser neket. Ji bo xwe jî, hinek bi şermokî an bi delalî dibêje; em jî negihiştin armancên xwe, lê em ê di hilbijartina cara dudan de bi serkevin! Belê bahsa wê helwesta xwe ya xerab nakin a M.Akşenera ku ji masê rabû çû û paşê jî bi lîsteya navê xwe kete hilbijartinan.
Hevbendiya CUMHUR dibêje; hevbendiya MILET bi ser neket. Ji bo xwe jî dibêjî; erê me armanca xwe bi dest nexist, lê dîsa aliyê herî dengê zêde wergirt em in û di cara dudan de em ê serkeftî bin! Belê, behsa ji bo rêvberiya xwe bide meşandin dengên kêrhatî/têr nestandî nakin. Jixwe heke di rejîmek asayî/normal de bûna, ew rêveberî/hukûmeta wan hilweşiya bû.
Hevbendiya KED û AZADIYÊ jî dibêje; tu hevbendî negihiştin armancên xwe û ne serkeftî bûn. Erê em jî negihiştin armancên xwe, lê li Kurdistanê em partiya yekemîn bûn û di cara dûdan de em ê serkeftî bin! Belê behsa kêmasiya TIPê bi dengê bilind nakin, nabêjin; bû sedemên ku herî kêm em deh parlementeran ji dest xwe berdin.
Bêguman divê bêrêtî û bêexlaqî û kiryarên bêzagonî yên faşîzma AKP-MHPê, di pêvajoya hilbijartinan de da meşandin neyê paşguhkirin û jibîrkirin.
Bi taybetî jî van kiryarên xwe yên qirêj li Kurdistanê û li dijî Partiya Çepa Kesk(YSP) da birêvebirin. Hijmarek zêde dengên YSPê hildan, li ser navê MHPê dan jimartin. Bi vê kiryarê re xwest; di nava MHPê û YSPê de şerekî mezin rûbide. Lê bi hişyariyek hêja, ev lîska R.T.Erdogan negihişt mirazê xwe.
Jixwe êrîşên xwe yên qirker, li Başûr û Rojava jî bêrawestan û bênavber dewam dike.
Li gel vanan, du gumanên din jî yên balkêş hene.
Yek: Bi gurkirina van şerên dijwar, van hilbijartinan çêneke û dema hilbijartinan dûr bixe.
Dudu: Heke hilbijartin çêbibe jî, li gel lîstikan bi huner/sixtekariyên teknolojî ve jî, dengê xwe bilind nîşan bidin. Ger ku derfetên hundur û derve dest bide, bi radeyek dengê zêde serkeftina xwe ragihînin!
Wisa diyar dibe ku ji bo van kiryarên qirêj, derfet di destê faşîzma AKP-MHPê hebûn, lê guman heye ku ‘eqlê jor’ destûr neda û rê li ber van kiryarên wan ên genî û qirêjtir venekir. Bêguman ew ‘eqlê jor’, ne hetiriyê qenciya gelê me an jî gelên herêmê bûn. Belê bi tenê ew berjewendên dewletên xwe li ber çavan digrin.
Bêguman êdî gelê me û tevgera wê jî, dikare li goreyî van gumanan tevbigere û gihiştiye vê hişmendiyê! Her wiha dikare ji hilbijartina yekê dersan derxe û di hilbiartina dûdan de serkeftî be.
