Fener…
Idrîs Henan
Ger mirov bal bide daxuyanî, axaftin û gotinên aliyên berbijêr li Tirkiyê û bakurê Kurdistanê, dê baş têbigihêje ku hilbijartinên 14’ Gulanê dîrokî ne. Bi vê têgihaştinê hemû alî di nav têkoşîneke bê hempa de ne. Lew re jî; serweriya AK partî – MHP, hemû sazî û dezgehên dewletê di hemleya xwe ya hilbijartinê de bi kar tîne û diçewisîne. Ji bo desteserkirina dengan, pêvajoya qirkirina siyasî daye destpêkirin û bi zanebûn Amed xiste navendê. Bi vê qonaxê re, carek din berê xwe da rêbazên berê û bi girtin, qirkirin, astengkirin û xapandinê, berê xwe daye dekûdolaban û bi hemû hêza xwe hewl dide, bi hîleyan, ewlehiya welêt têk bibe û carek din bibe desthilatdar. Reftarên partiya desthilatê ne dûrî cewherê faşîzmê ne. Di bingeh de, malzarokatiya faşîzmê dike û dixwaze carek din, neo-faşîzmeke mînaka wê nehatiye dîtin biwelidîne. Vê yekê fikarên gelên li Tirkiyê û Kurdistanê zêde kirine û ewlekariya sindoqan aniye keviyeke metirsîdar a desteserkirinê.
Tevî hemû hîleyên faşîzma AKP – MHP, nekarî raya giştî bixapîne û çi navendên ankêtan hene, pêşbîniya têkçûna desthilata heyî ya Erdogan dikirin. Ji ber vê xofa ketiye dilê wan, hemû hêza “dewleta kûr” xistiye çalakiyê û ji bo dizî, destserkirin û xesibkirina dengan seferber kirine. Lew re; herderê provakasyon, şer, êriş, girtin û êşkence dest pê kiriye û bi dirindeyiya ku temsîla hovîtiya sedsaleke nû ya qirkirin û tunebûnê bike, êrişî vîna gel ya sindoqan dike.
Ji ber vê rastiya desthilatdariya faşîst a Erdogan, pêwîste rikberiya ku nûnertiya vîna gelan dike, hemû hîleyên hilbijartinê yên bi ihtîmala radestkirinê werin nirxandin û tedbîrên pêşwext werin girtin. Ji ber vê zanebûna dîrokî ya Partiya Çepên Kesk, îroj zêdeyî 100 hezar dilxwazên partiyê sindoqan diparêzin. Li rex van hemûyan jî, zêdeyî 3 hezar parêzerên ku wê bi mûdaxele û itîrazên pêwîst li dijî hilbijartinê bixebitin.
Her wiha; divê gelê me, îroj, bi hemû rengên xwe li dijî çi alavên ragihandinê yên desthilatê û çi hewldanên hîlebazî û desteserkirinê hişyar bin. Di heman demê de, ji bona ku rê li ber ajitasyon, êrişên odeyên şerê taybet û şerên piskolojîk were girtin, pêwîste gelê me çi agahiyên di derbarê hilbijartinan de hebin, ji navenda koordînasyona hilbijratinan a fermî werbigire. Derveyî vê yek bila guh nedin ti aliyan û bila baweriya xwe bi serkeftina îro mezintir dibe bîne.
Ji bo parastina nirxên xwe, vîna xwe, pêşeroja xwe, qeder û heyîna xwe, lazime her yek bi vê berpirsiyariyê tev bigere û roja hilbijratina xwe erkdar bibîne û deng bide xwe. Rê nedin faşîst û nijadperestan û bi hev re pêşeroja vî welatî ber bi demokratîkbûnê ve biparêzin û biguherin.
Hêza bingehîn a guherînê gel e, dînamîka veguherîner gel e, ancax serkeftin bi hişyarî û yekdestiya gel bi xwe be. Ev misyon, ji erka yek beşekî Kurdistanê wêdetir, erka tevayî gelên li Kurdistanê û bi taybet gelê Kurd e. Encamên vê hilbijartinê çi dibin bila bibin, bê guman deriya bihuştê venakin, lê bi kêmanî wê deriyekî dojehî jî bigrin. Lew re; xwedîderketina li paradîgmaya itîfaqa Partiya Çepên Kesek, misogeriya jiyaneke birûmet û azad e.