DILYAR CIZÎRÎ
Dewleta Tirk a dagirker di 17’ê nîsana 2022’an bi hemû cûreyên çekên pêşketî yên NATO û bi hevkariya çekdarên PDK’ê êrîşî herêmên Metîna, Zap û Avaşînê kir. Di êrişên hîn jî dewam dikin de bi hezaran car çekên kîmyawî û cûreyên din ên qedexikirî bikar anîn. Lê di encama berxwedana bê hempa ya gêrîlayên azadiyê de hemû êrîş hatin têkbirin û artêşa Tirk neçar ma hêzên xwe ji gelek herêman vekşîne.
Balkêş bû ku di dema êrîşê de Erdogan û artêşa wî îda dikirin wê di demeke kurt de herêmên ku êrîşê wan kirine dagir bikin û qadên gêrîla dorpêç bikin. Erdoxan wiha bawer dikir wê di qadên gêrîla de tevgera azadiyê tasfiye bike û bi vê serkeftinê biçe hilbijartinê. Gêrîla bi berxwedana xwe ew plan têk bir. Hemwextî êrîşan tecrîda girankirî ya li dijî Rêber APO dewam dike. Ev zêdeyî 2 sal in bi tu awayî agahî ji Imralî nayê girtin.
Êrîşên wan ên li dijî Bakur û Rojhilatê Sûriyê jî dewam dikin û ya herî dijwar jî şeva 20’ê mijdara 2022’an bû. Di ecamê de bi balafirên şer binesaziya herêmê bi dijwarî hate bombebarankirin. Rojnamevan jî di nav de gelek welatiyên sivîl şehîd û birîndar bûn. Lê ji ber amedekariya QSD’ê Erdogan di vir de jî riya hilbijartinan venekir.
Ev rewş heta erdheja 6’ê sibatê dewam kir. Bi erhejê re çavên her kesî guhertî ser rewşa mirovî û bobelata bi serê gelê Bakurê Kurdistan, Tirkiyê û Sûriyê hatiye. Her kesî hêvî dikir, dewleta Tirk êrîşên xwe rawestîne. Lê hîn bi hezaran insan di binê kavilan de bûn, êrîşên dewleta Tirk li dijî Bakur û Rojhilatê Sûriyê û li Başûrê Kurdistanê dewam dikin. Her çendî êrîş dijwar bûn jî destkeftiya lê digeriyan bi dest nexistin.
Niha û bi nêzîkbûna dema hilbijartinên li Tirkiyê û Bakurê Kurdistanê ku tê payîn di 14’ê gulanê de werine lidarxistin, gera dewleta Tirk a li wê destkeftiyê bi rê û rêbazên cûda dewam dike. Ji ber wê yekê vir de wir de xwe davêje Rûsiya da wan û hikûmeta Şamê lihev bîne û wiha zemîna êrîşkirinek berfireh li dijî Bakur û Rojhilatê Sûriyê beriya hilbijartinan bi dest bixe.
Li aliyê din jî êrîşa li balafirgeha Silêmaniyê ya Başûrê Kurdistanê di çarçoveya hewldanên wan a destxistina serkeftina behsa mijarê ye. wiha hêvî dikirin ewê karibin di kesayeta rayedarên Bakur û Rojhilatê Sûriyê de destkeftiyên xwe yên ji bo hilbijartinan bi dest bixin.
Berûvajî bi êrîşa li dijî silêmaniyê hestê gelê kurd ê yekîtiya Netewî hîn bi hêztir kir. Ev jî di mesa girseyî ya li Silêmaniyê li dijî êrîşa dewleta Tirk lidarxistî de baş hate dîtin. Niha jî rayedarên dewleta Tirk dixwazin êrîşa niha û êrîşên berê yên li dijî Silêmaniyê rewa nîşan bidin. JI ber wê jî Çavuşoglu îda kir PKK û PYD li Silêmaniyê her derê kontrol dikin. Ev jî careke din têkçûyîn û iflasa wan nîşan dide.
Ji ber wê jî nêrîna min wê têkçiwînên wan heta piştî 14’ê gulanê jî dewam bike.
