Ahmet Aktaş
Ne tişteki matmayî ye ku dewleta tirk, her mijarê û bûyerê li dijî doza gelê Kurdistanê bidin xebitandin.
Lê ya belkêş û rûreş, hilwesta Malbata Berzanî ya li dijberî doza gelê Kurdistanê ye. Di vê mijarê de jî xala herî malxerab, cihgirtina wan a li gel neyarên Kurdistanê ye.
Li ser vê erdhejî, gelek nîqaş û tevlihevî derketin holê. Bi giranî jî, HDP, CHP û hemû aliyên li himberî desthilatiya faşîst a AKP-MHPê, bi tundî hilwest niişan dan û hîn jî ev dijberî dewam dike.
Di vî haletê ku gunehbariya desthilatiya Erdogan û Bahçelî teşhîr û tengav dibûn de, Nêçjirvan Berzanî, li Islahiye-Dîlok derket pêşberî kamerayan û got, “ez hatime alîkariya bidim mexdûrên Erdhejî” û hwd.(ya rast; çûbû rûreşiya Receb rûsipî bike!)
Hema li pey Nêçîrvan, Mûsa Ehmedê serokê Dezgeha Xêrxwaziya Berzanî, li Efrîna birîndara-dagirkirî derket Rûdawê-Kurdistan 24 û hwd.bi pesindarî got, “em hatine alîkariyê bigihinê erhejzedeyan(ya rast;çeteyan) û me li vira ofisek jî vekir” û hwd!
Erê gotinên qelew dikir û dixwest xwe serbilind nîşan bide, lê di rûyê/derûniya wî de, weke zanibû êdî karê wan çendîn di xizmeta siyaseta dewleta tirk de ye nayê veşartin û êdî gelê Kurdistanê wan zelaltir nas dike.
Jixwe digot, “em, ji yên alîkariya me kiriye spas dikin, ji bo hatina me ya Efrînê”, lê navê dewleta tirk ne dida.
Mixabin, “çermê rûyê wan ewqas stûr bûye”, êdî eyb û ar û şerm jî bi wan re nema ye.
Her wiha, weke pir caran, vê carê jî xizmetek mezîn pêşkêşî siyaseta qirker a dewleta tirk kirin û dikin.
Jiber ku bi vî karê xwe ve, dîsa ji pak kirina siyaseta qirêj û kurdkuj a dewleta tirk a derewîn û guhertina demografiya Rojava re, dibin derman.
Dibe ku karibe hinekî raya giştî bixapîne, lê belê êdî nikare gelê Kurdistanê, weke berê bi hêsanî bixapîne.
Jiber ku, ma ne li ber çava ye(?), heke bixwazin alîkariyê bigihêne gelê me yê Rojava, di navbêna wan û Rojava de bi tenê pira SÊMALKA heye, ew jî 100 metre ye!
Ma gelo çima wê alîkariya xwe/xêrxwaziya xwe, ewqas dûr dixin; 1000 km rê diçin?!
Jixwe, dibe ku jiber hinek rexneyan be, piştî çend rojan got, “em alîkariyê him dibin Bakur(Semsûrê), him dibin Rojava”.
Heke rast be, ma gelo çima hema yekser bi hêsanî di rojava re; ji Dêrika Hemko heta Efrînê alîkariyê erdhejê nabin?
Her wiha ma li Şêxmeqsûd, Eşrefiyê û Şehba jî erhej nebû û van deveran jî ne cihên Kurdnişîn e.
Hek bi rastî hûn xêrxwazên gelê Kurdistanê bûna, we yê, alîkarî bi sazî û dezgehên Kurdistanî re, bigihanda mexdûran! Weke mînakek şênber; hema cînarê we şaredariya Silopya(ji sed şaredariyan yek dudu man e, yên din hemû qayyûm kirine) hebû û wan alîkarî birin ji erdhejzedeyan re, we jî dikaribûn bi wan re ev karê pîroz pêk anîba.
Lê na xêr, we dewleta tirk bijart şwîna Kurdistaniyan. Dilê mirovan hilnagire ku hûn ewqas xwelîsareyê layiqêe xwe dibîne, lê mixabin/bidaxewe, hûn dest ji vî karê malxerab û rûreş bernadin!
