Meclisa Giştî ya taxên Şêxmeqsûd û Eşrefiyê bi daxuyaniyekê êrişa bombeyî şermezar kir û got, êrişa ji aliyê komên girêdayî MÎTʹê ve hate kirin û di encamê de endamê Komîteya Aborî şehîd bû û 3 kes jî birîndar bûn..
Navenda Nûçeyan
Meclisa Giştî ya Taxên Şêxmeqsûd û Eşrefiyê têkildarî êrişa bi erebeyeke bombebarkirî ya li Şêxmeqsûdê daxuyaniyek nivisîkî weşand.
Meclisa Giştî ya Taxên Şêxmeqsûd û Eşrefiyê di daxuyaniya xwe de sersaxî ji malbatên qurbaniyên erdhejê û tevahî şehîdên êrişên dewleta Tirk a faşîst re, xwest û wiha got: “Tevî erdhejê jî dewleta Tirk êrişên xwe bi rêya teqîn û balafirên bê mirov li dijî sivîlan û saziyên sivîl didomîne.Tevî ambargoya giran a li ser taxên Şêxmeqsûd û Eşrefiyê, Meclisa Giştî û saziyên taxê, bi taybet Komîteya Aborî di saetên destpêkê de serfer bû û destek da mexdûrên erdhjê. Îro jî endamê Komîteya Aborî Hemze Kobanê ji aliyê komên girêdayî MÎTʹê ve bi erebeyeke bombebarkirî hat hedefgirtin. Hemze Kobanê bi şev û bi roj bê westandin ji bo xizmeta şêniyan kar dikir û di mercên herî zehmet de pêwîstiyên wan peyda dikir.”
Mecilsê ragehnad ku hevrê wan Hemze Kobanê tev li karwanên nemiran bû, 3 kesên din jî birîndar bûn, rewşa birîndarekî giran e û wiha domand: “Em vî sûcê derexlaqî û dermirovî yê dewleta Tirk a faşîst şermezar dikin. Ev sûc di mercên zehmet ên erdhejê û ambargo de di kesayeta hevrê Hemze Kobanê de li dijî şêniyên Şêxmeqsûd û Eşrefiyê bû.
Meclisa Giştî ya Taxên Şêxmeqsûd û Eşrefiyê daxuyaniya xwe wiha qedand: “Em soz didin şehîd Hemze ku em li li ser xeta wî bimeşin û li gorî wê berpirsyariyê bin.”
