Navenda Nûçeyan
Li bajar û navçeyên Qamişloyê ya herêma Cizîrê bi boneya Roja Zimanê Dayikê ya Cîhanê çalakiyên cûrbecûr hatin lidarxistin û daxuyanî hatin dayîn. Herwiha banga xwedî derketina zimanê dayîkê, li hemû gelan hat kirin.
Bi boneya 21′ê Sibatê Roja Zimanê Dayikê ya Cîhanê çalakiyên li Qamişlo, Tirbêspiyê, Çilaxa, Tilbirak û Tilhemis meş, daxuyanî û hwd li bajar û navçeyên Qamişloyê hatin lidarxistin.
Rêveberiya Dibistanên Amûdê bi vê boneyê meşek li dar xist.
Meşê ji Qada Şehîd Cîhad dest pê kir. Li Qada Jina Azad a li têketina navçeyê, meş vegerî mîtîngê. Li wir daxuyanî bi zimanê erebî û kurdî hat xwandin.
Di daxuyaniyê de bal kişand ser sîstema Netewa Demokratîk û diyar kir ku Şoreşa Rojava, Bakur û Rojhilatê Sûriyeyê bi xwe re pergala perwerdeyê ya demokratîk ji hemû pêkhateyên herêmê (Kurd, Ereb û Suryanan) re anî. Herwiha da xuyakirin ku bi sîstema Netewa Demokraktî destekê didin taybetmendiyên perwerdeyê yên her pêkhateyekê da ku bi zimanê xwe yê dayikê bixwînin.
Her wiha hat diyarkirin ku li dijî hemû hewlên ji bo asîmîlekirinê yên rejîmên desthilad, Kurdan ziman û nasnameya xwe parast.
Qamişlo
Li bajarê Qamişlo, Zanîngeha Rojava li ser pêşketina ziman û tekoşîna li dijî plan û pirojeyên asimilekirinê, rêzesemîner hat lidarxistin.
Herwiha pisporên zimanê kurdî yên ji Rojhilat, Başûr û Bakurê Kurdistanê bi rêya online beşdarî vê semînerê bûn.
Di semînera yekemîn de, mamosteyê Zanîngeha Rojava-Beşa Wêjeya Kurdî Newaf Mela Beşîr, endama Beşa Lêkolînan a Saziya Zimanê Kurdî (SZK) Gulê Hesen li ser rewşa perwerdeya bi zimanê kurdî ji destpêka Şoreşa 19′ê Tîrmehê ve heya niha, axivîn.
Di semînera duyemîn de rewşa zimanê kurdî li parçeyên din ên Kurdistanê û astengiyên heyî, hatin nîqaşkirin.
Di beşa sêyemîn de astengiyên li pêşberî Zanîngeha Rojava û Zanîngeha Kobanê di aliyê perwerdeya bi zimanê kurdî de hatin niqaşkirin.
Tirbespiyê
Rêveberiya Dibistanan a Navçeya Tirbespiyê jî daxuyaniyek li Dibistana Şehîd Ronak da.
Di daxuyaniyê de Roja Zimanê Dayikê ya Cîhanê hat pîrozkirin û wiha hate gotin: “Ziman nasname ye û girêdana di navbera dema îro, paşeroj û siberojê de ye.”
Di daxuyaniyê de êrişên dewleta Tirk a dagirker ên li ser qadên perwerdeyê yên Bakur û Rojhilatê Sûriyeyê hatin şermezarkirin û bang li hêzên navneteweyî hate kirin ku çanda neteweyan biparêzin û mafê perwerdeya bi zimanê dayikê yê welatiyên Sûriyeyê mîsoger bikin.
Çilaxa
Li navçeya Çilaxa jî daxuyaniyek li ber avahiya Rêveberiya Dibistanan hate dayîn.
Di daxuyaniyê de bal kişand ser rola sîstema Netewa Demokratîk ya Rêveberiya Xweser û girîngiya parastina zimanên pêkhateyên herêmê ya di vê sîstemê de.
Tilhemîs
Bi dehan xwendekar li pêşiya Meclisa Navçeya Til Hemîsê kom bûn û daxuyaniyek da.
Di daxuyaniyê de hat diyarkirin ku zimanê dayîkê nasnameya civakî ya netewan e. herwiha da zanîn ku hêzên mêtinger hewl didin ziman û nasnameyên civakan, tune bikin. Dîsa hat diyarkirin ku Dewletên dagirker zimanê dayîkê dikin armanc û şerê tinekirina zimanan dikin, da civakan ji koka wan qut bikin.
Herwiha bal kişand ser tekoşîna gelan ya li dijî vê politikaya qirêj û hat ragihandin ku îsrara gelan û girêdana wan bi zimanê dayikê re, hemû planên dewletên dijberî mafên gelan têk birin.
Tilbirak
Navenda Perwerdeyê ya navçeya Til Birakê jî bi heman wesîleyê daxuyanî da. Daxuyanî li ber Dibistana Şehîd Elî Selobî ji aliyê endamê Rêveberiya Dibistanan a navçeyê Eyûb Ebdo ve hat xwendin.
Di daxuyaniyê de hat diyarkirin ku ziman dîroka mirovahiyê ye. Her wiha bal kişand ser bandora ziman ya li ser hevgirtina civakê û da diyarkirin ku zimanê dayîkê axaftin mafekî miroviye.
Di dawiya daxuyaniyê de banga hevgirtinê û xwedîderketina li zimanê dayikê li hemû gelan hate kirin.