Dilyar Cizîrî
Di roja 26`ê meha Çile de, gelê kurd salvegera efsaneya dîrokî ya rizgarkirina Kobanê pîroz kir. Di wê rojê de tovên hêviya azadiyê hatin çandin û rûyên tarî eşkere bûn. Di encama berxwedana Kobanê de hemû planên dewleta Tirk a ku bi hemû hêza xwe piştgiriya çeteyên DAIŞ’ê kir û têk çûn. Aloziyên îro Erdogan di hindir û derve de jiyan dike, bi Berxwedana Kobanê re destpê kir.
Mirov bi hêsanî dikare bêje, roja 26’ê çile salvegera destpêka têkçûna plan û projeyên Erdogan yên di herêmê de ye. Bi vê yekê ve girêdayî, ji nîsana sala derbasbûyî ve heta niha Artêşa Tirk li herêmên Zap, Metîna û Avaşînê, bi hemû cûreyên çekên pêşketî yên NATO’yê êrişî gêrîlan dike. Çekên Kîmyawî û hemû cûreyên çekên qedexekirî bikar tîne, lê nikare encaman bi dest bixe. Li wir jî li ber berxwedana bi rumet a gêrîlayan xetimandinê, jiyan dike.
Di heman demê de li Bakurê Kurdistanê û Tirkiyê, rêjeya dengên piştgiriya AKP/MHP’ê her ku diçe kêm dibin û ji bo hilbijartina aloziyeke mezin jiyan dikin. Bi fikarin ku di hilbijartinan de bi ser nakevin.
Di rewşeke wiha de Serokê Herêma Başûrê Kurdistanê Nêçîrvan Barzanî, di 26’ê çile de an ku salvegera rizgarkirina Kobanê de, li Enqerê serdana Erdogan kir! Beriya wê jî, serdana Bexda kir û di derbarê Tirkiyê de bi rayedarên Hikûmetê re hevdîtin pêk anî. Di hevdîtinan de mijarên ewlehiyê û metirsiyên Tirkiyê di rêza yekem de hatin nîqaşkirin.
Serdana Barzanî ya Tirkiyê jî, encamên hevdîtinên li Bexda bi Erdogan re parve kir. Di salvegera rizgarkirina Kobanê de çûyîn jî, Nêçîrvan Barzanî peyama piştevaniyê da Erdogan û li gel wî peyamek ji bo Berxwedana Kobanê weşand.
Ango di wê rojê de armanca serdanê baş diyar dibe. Piştî Nêçîrvan Barzanî ji Enqere vegeriya, rayedarên partiya Isalmî ya Başûrê Kurdistanê jî, serdana Enqerê kirin. Ew serdana jî, di çarçoveya heman armancê de pêk hatiye. Bi wê jî dixwazin ji raya giştî ya Bakurê Kurdistanê û Tirkiyê re bêjin, “fermo vaye kurd li gel Erdogan in” û dixwaze bi vê rê dengên kurdên li Bakurê Kurdistanê ji bo Erdogan bi dest bixe.
Ev serdan û razîkirinên rayedarên PDK’ê ji dewleta Tirk û Erdogan re, ne cara yekem e û diyare wê ne ya dawî be jî. Nizanim, birêz Nêçîrvan Barzanî helwesta Erdogan ya li dijî referanduma başurê Kurdistanê ya di sala 2017’an de, têne bîra xwe yan na! Eger bîne bîra xwe, wêdemê Erdogan gafa xeniqandinê li Başûrê Kurdistanê xwar û ew wekî ‘ne tiştek’ pênase kir.
Gelo çima Serokê Herêma Başûrê Kurdistanê Nêçîrvan Barzanî, naxwaze wan daxuyaniyên Erdogan ên li dijî gelê Kurd û statoya Başûrê Kurdistanê bîne bîra xwe. Lê diyare ne ku ew nayîne bîra xwe, ya rast ew di hevkarî û piştgiriya dewleta Tirk û Erdogan de, asê maye.
Lê di rewşeke wiha de, ji gelê kurd û dostên wan tê xwestin ku çawa Berxwedana Kobanê di 26’ê Çile de bi rizgarkirinê tacedar kir. Niha jî tê xwestin bi valaderxistina planên Erdogan, destkeftiyên xwe tacedar bikin.
