Dilyar Cizîrî
Dewleta Tirk careke din gefa êrişên dagirkiriyê, li dijî herêmên Bakur û Rojhilatê Sûriyê dixwe. Fermandarê QSD’ê Mazlûm Ebdê derbarê gefan de bersiva pirsên Rojnameya El-Menîtor a Amarîkî da û diyar kir ku bi nêzîkbûna hilbijartinên li Tirkiyê re ihtîmala êrişên nû heye. Ew jî bi cidiyet nêzî vê mijarê dibin û destnîşan kir ku ew ê ji bo parastina herêmê her tiştî bikin. Ji xwe her dem ev helwesta QSD’ê û fermandariya zelal e.
Lê ya ne zelal û hemwextî nûkirina gefa êrişeke bejahî ya li dijî herêmê û hin raporên bi hev re di bin navê “binpêkirinên mafan” de, werin weşandin. Di nerîna min de ne tesadife ku rapora “Toreya Rojnamevanên Kurdên Sûriyê” di bin navê binpêkirinên li dijî rojnamevanan de û rapora rêxistina Human Rights Watch ya sala 2022’an ya di beşê xwe yê li ser Sûriyayê de diyar kiri; herwiha îdayên girtina rojnamevanan û îdayên sûcên li dijî mafê mirovan li yên li herêmên Rêveberiya Xweser, bi zimanekî kirêt werin rêzkirin.
Tiştê van xalan baş zelal dike jî, yekser hin malper û saziyên ragihandinê agahî ji rapora Toreya Rojnamevanên Kurd derxistin û ji bo reşkirina Rêveberiya Xweser û QSD’ê bikar anîn. Di wir de jî sûcên dewleta Tirk, wekî QSD’ê kiriye nîşan didin.
Di heman demê de rapora Human Rights Watch ku agahiyên xwe naspêrin çavkaniyên fermî yên herêmê, berûvajî wê dispêre alîgirên Tirkiyê. Tevî tê zanîn, saziyên fermî di hemû aliyan de li herêmê hene Human Rights Watch, bê ku berê xwe bide wan îddea û agahiyên ji rastiyê dûr, li ser zimanê alîgirên Tirkiyê di rapora xwe de bi cih kirin e
Ji ber wê jî divê gelê me û her kesekî dilê wî ji bo ewlehî û aramiya herêmên Bakur û Rojhilatê Sûriyê lêdide, hişyar be. Planek dijberiya herêmên Bakur û Rojhilatê Sûriyê di xizmeta dewleta Tirk a dagirker de heye. Dibe hin kes pirsa çawa di xizmeta dewleta Tirk de ye, bikin.
Em jî wan re dibêjin: hemwextî êrîşan reşkirina Rêveberiya Xweser û QSD’ê wê di xizmeta kê de bin gelo? Bersiv jî ew ku bi van raporan dixwazin bingehê êrişek nû ava bikin e.
Bi taybet ev demeke her gefên Erdogan ên êrîşkirina li dijî herêmê rastî ne razîbûna aliyan tê. Ji ber wê jî vê carê bi van raporên reşkirinê zemînê ava dikin û rojevan li gorî berjewendiyê xwe çêdikin.
Tişta zêde mirov dêşîne jî, hin kesên em nas dikin niha li herêmê nasnameya rojnamevaniyê wergirtine û bi saya QSD’ê û Rêveberiya Xweser, dikarin rehet pîşeya rojnemaveniyê bikin, lê cihê xwe di van rapor û îdayên reşkirinê de digirin. Di vir de armanca min ne ewe ku ez bêjim kêmasî nînin û di herêmê de her tişt çar çare, lê gotina min ji her kesî re destê xwe dîne ser wijdanê xwe. Divê tu kes li pey xizmetkarên dijmin nekevin, ji ber ev qonaxa man û namana me ye.
