Navenda nûçeyan
Parêzerên Rêberê Gelê Kurd Abdullah Ocalan serî li CPT’ê dan ku rapora xwe ya derbarê serdana Îmraliyê eşkere bike.
Parêzerên Buroya Hiqûqê ya Asrin’ê têkildarî miwekîlên xwe yên li zîndana Îmraliyê, dîsa serî li Komîteya Pêşîlêgirtina Îşkenceyê ya Ewropayê (CPT) dan. Di serlêdanê de ji CPT’yê hat xwestin ku rapora xwe ya têkildarî serdana 20-29’ê Îlonê de, bi raya giştî re parve bike.
Di serlêdanê de hat diyarkirin ku mafên hevdîtina bi malbat û parêzeran re, name û ragihandinê tên binpêkirin. Herwiha hat zanîn ku mafên parastin û darizandina adilane jî, tên astengkirin. Disa hat diyarkirin ku mafên navborî bi Peymana Mafên Mirovan a Ewropayê (PMM) hatine mîsogerkirin û wiha hat gotin: “Rewşa ‘Incommunicado’ (agahî negirtin) hêj girantir bûye. Di nava 3 mehên dawî de bi awayekî rêk û pêk ji bo Serdozgeriya Komarê ya Bursayê û Rêveberiya Girtîgeha Tîpa F a bi Ewlekariya Bilind a Îmraliyê, serlêdan hatin kirin. Parêzeran 32 caran û malbatan jî 14 caran serî li herdu saziyan dan. Lê ev serlêdan bêbersiv hatin hiştin.”
Di berdewamê de wiha hat gotin: “Di serî de saziyên Ewropayê, ji 22 welatên cuda 350 parêzeran di 14 û di 19’ê Îlonê de, ji Rojhilata Navîn 756 parêzeran serî li Wezareta Edaletê dan. Lê ev serlêdan nehatin bersivandin û aqûbeta nameyên hatine şandin jî, nayên zanîn. Her wiha nayê zanîn bê ka nameya nû ya di 27’ê Îlona 2022’yan di dema vê raporê de hatiye şandin, gihiştiye yan na.”
Di berdewamiya serlêdanê de ev daxwaz ji CPT’yê re hatin kirin:
“* Divê komîteya we rapor û tespîtên xwe yên têkildarî serdana dawî ‘tavilê’ bi raya giştî re parve bike.
* Ji bo ku parêzer bikarin hevdîtinan bikin û ev hevdîtin domdar bin, hewceye hûn rê li ber biryarên derhiqûqî yên bi rêya dadgehan tên dayîn, bigirin.
* Ji bo ku malbat û vasî bikarin hevdîtinan bikin û ev hevdîtin domdar bin, divê hûn yasayên we bixwe diyarkirî pêk bînin ku rê li ber cezayên disiplînê yên derhiqûqî were girtin.
* Li gel bicihanîna mafê serdanê, her wiha divê serlêdêr bikarin mafê xwe yên hevdîtina li ser telefonê jî bi kar bînin û hûn bingeha vî tiştî amade bikin.
* Ji bo ku girtî bikarin li derve jî, bi parêzerên xwe re bi rêya name, telgraf û faksê peywendiyan deynin, hewce ye hûn erkê xwe pêk binin ku hemû astengî werin rakirin.
* Divê sepanên derhiqûqî yên ji bo qedexekirina rojname, kovar û pirtûkan bi dawî bibin.
* Divê tevdîrên xurt ên ji bo rakirina rewşa îşkence, nêzîkatiyên dermirovî û nebaş û incommunicadoyê werin stendin û prosedûrên di çarçoveya Xala 10/2. a Peymanê werin pêkanîn.”
