Darîn Silê/Qamişlo
Bi dirûşma `Bi Rihê Têkoşîna Şoreşa Jinê Emê Jin Jiyan Azadî Bi Ser Bixin` di salvegera damezrandina Kongra Star ê (15`ê Çile) de Kongreya Star ê konferansa xwe ya 9`an li navenda Serdem ya Çandê li bajarê Hesekê li dar xist.
Konferans bi deqîqeyeke rêzgirtinê li ser giyanê şehîdan dest pê kir. Piştre gotina vekirinê ji aliyê endama koordînasyona Kongreya Star Rîhan Loqo hat xwendin.
Di konferansê de zêdetirî hezar jinên bakur û rojhilatê Sûriyê yên sazî û navendên Rêveberiya Xweser, herwiha jinên nûnerên rêveberiya xweser û yên girêdayî şaxên Kongireya Star û ji her pêkhateyên kurd, ereb, sûryan û êzîdî amade bûn.
Koordînasyona Kongreya Star Rîhan Loqo di destpêka konferansê de ev nirxandin kirin: “Di van herdû salên dawî de êriş û balafirên dagîrkeriya tirkî bê navber li ser herêm û gelê me dewam dikin. Herwiha Tirkiyê ji bo şikandina îradeya jina azad hertim planên qirêj danîn e. Lê tevî dagîrkeriya ku dide meşandin û kiryarên wê yên hovane, jinên ku bi felsefeya Netewa Demokratîk hatine perwerdekirin serî ji dagîrkerî û desthilatdariyê re netewandin û hertim li beramberî hişmendî û sîstema kapîtalîst gotin, `na`. Herwiha tevî ewqas dijberî û êrişên sîstem desthilatdar, hişmendiya wa ya zayendperestî, kiryar û planên qirêj, jin her roj li qadan e û bi hev re xwedî li şoreşa xwe derdikevin.“
Rîhan Loqo di dawiya axaftina xwe de got, Hêviyên me ew in ku di şert û mercên niha yên herî zehmet de, em azadî û serkeftina xwe bi dest bixin û kar û xebata bi biryardarî û rihê Şoreşê dewam bikin.
Piştre 5 endam ji bo dîwana konferansê ji hêla kesên amade ve hatin hilbijartin da ku konferansê bi rêve bibin. Kesên hatin hilbijatin jî, Rîhan Loqo, Remziya Mihemed, Cîhan Hisên, Mizgîn Xelîl û Emel Ebdilhemîd Simaîl bûn.
Herwiha perspektîfên Rêber Abdullah Ocalan yên ser têkoşîn û azadiya jin û gel hatin xwendin û dîmenên pîrozbahiyê ji gelek deverên cîhanê li ser sênevizyonê hatin pêşkêşkirin.
Ji bilî dîmenên pîrozbahiyên jinên ku beşdarî konferansê bûbûn salvegera 18`an ya Kongreya Star di serî de li Rêber Abdullah Ocalan û li tevayiya jinên berxwedêr û yên cîhanê, pîroz kirin.
Piştre rapora salane ya Kongerya Star hat xwendin û tê de rewşa siyasî, rêxistinî û kar û xebata wê ya du salan hat nirxandin.
Herî dawî jî biryarên konferansê hatin xwendin û ji aliyê kesên amade ve hatin erêkirin. Herwiha 7 kes ji bo koordînasyonê jî hatin hilbijartin.
Biryarên Kongrya Star yên konferansa 9`an wiha ne:
1- Pêşgotina hevpeymanê li gorî nirxandinên li ser hatine zêdekirin hin guhertin li ser were çêkirin.
2- Avakirina komîteya serokatî.
3- Avakirina Komîteya hevjiyana azad.
4- Avakirina Komîteya parastina cewherî li ser asta bakur û rojhilatê Sûriyê.
5- Komîteya siyasî û dîblomasî bû, komîteya têkîlî û itîfaq û siyaseta demokratîk ya Kongreya Star.
6- Zêdekirina desteya displînê li ser beşê mîkanîzmeya rêxistinî ya Kongreya Star
7- Du beşên rêziknameyê derbasî hevpeymanê bibin.
Kesên ku ji bo koordînasyonê hatin hilbijartin, Remziya Mihemed, Rîhan Loqo, Şadiya Yûsif, Welîda Botî,Hêvî Silêman, Sûad Hesen û Nisrîn dogo bû.
Piştî nîqaş û hilbijartinan konferans bi dirûşmeya `Bi Rihê Têkoşîna Şoreşa Jinê Emê Jin Jiyan Azadî Bi Ser Bixin` bi dawî bû û govenda jinan hat gerandin. 
