Navenda Nûçeyan
Serhildana gel li Rojhilatê Kurdistan û Îran di roja 116’an de bênavber dewam dike, tevî ku rêjîma Îranê li dijî serhildêran şidet, girtin û kuştinê jî dike, lê gel bi biryardariyeke mezin serhildanê geş dike û li ser riya azadiyê dimeşe.
Serhildana gel yên li Rojhilatê Kurdistan û Îranê ku piştî qetilkirina jina Kurd Jîna Emînî dest pê kir, di roja xwe ya 116’emîn de didome. Xwepêşandanên gel roj bi roj berfirehtir dibin. Tevî ku rêjîma Îranê li dijî xwepêşanderan girtin, işkencekirin û koştinê jî dike, gel dst ji doza azadiyê bernade û serî radike.
Li gorî malperên Îranê yên fermî rêjîmê ji destpêka serhildanên gel yên ku di 16’ê Îlona 2021’an hatibû destpêkirin û heya niha 4 çalakvanên ku tevlî xwepêşandanan bûne darve kir, herwiha cezayê bi darvekirinê li çar ciwanên din birîn e.
Yek ji wan ciwanên ku mehkumê cezayê darvekirinê bûye jî, ciwanê Belûç Kambiz Khroûte, li gorî nûçeyên hatine belavkirin, ciwanê Belûçî bi hinceta şewitandina bankekê bi sûcê muharebe û gendeliya li ser rûyê erdê, mehkûmê cezayê darvekirinê hat kirin. Ev yek piştî ku xwepêşanderan diyar kirin ku banka ji aliyê kesên bi cil û bergên sivîl hatine şewitandin û dikana Kambiz Khroût li kêleka banka ye. Kambiz Khroût piştî ku hat girtin, bi kefalet hat berdan û careke din hat gazîkirin û mehkûmê cezayê darvekirine hat kirin.
Herwiha rêjîma Îranê cezayî darvekirinê li 3’ê xwepêşanderên ku di xwepêşandanan de hatibûn girtin, birî. Di heman demê de 5 xwepêşander jî mehkûmê 58 sal cezayê girtîgehê hatin kirin.
Li gorî agahiyên ku hatine parvekirin, rojnamevan û xwendekara rojnamevanî ya zanîngeha Alameh Tabatabaî Nazîla Marûfîan, çalakvana sendîkaya mamosteyan Jîla Kheîr hat berdan, nivîskara Blogê ya Tebrîzî Sonia (Sona) Rahmanzadeh û ji Zanîngeha Terbiat Modares a Tahranê mezûna hunerê Zohreh Jam bi kefaleta hatin berdan.
