Li Rojhilatê Kurdistanê û Îranê serhildana gel dewam dike, rêjîma Îranê jî li hemberî serhildêran kuştin , binçavkirin û işkencekirin zêde kiriye. Herî dawî 2 xwepêşander ji aliyê rêjma Îranê ve hatin bi darvekirin
Navenda Nûçeyan
Serhildanên gelên Rojhilatê Kurdistan û Îranê bênavber dewam dikin, rêjîma Îranê jî li dijî serhildanan kuştin, girtin û işkencekirin zêde kiriye. Tevî ku rêjîma Îranê cezayên bi darvekirinê li gelek xwepêşanderên ku hatine biçavkirin biriye jî, xwepêşandan bi biryardarî dewam dikin.
Di 6’ê Çileyê de bi hezaran kes li bajarê Zahîdanê daketin kolanan û li dijî rêjîma Îranê qîriyan. Xwepêşanderan dirûşmeyên, ’Berxwedan Jiyane’ û ’Jin Jiyan Azadî ’ bilind kirin. Herwiha li bajarê Sine yê Rojhilatê Kurdistanê li çiyayê Awyer jimarek welatî kom bûn û bi dirûşmeya, ’Jin, Jiyan, Azadî’ avêtin.
Herwiha li bajarê Sinê jî ciwanên daketin qadan û bi pêxistina agir rê girtin û dirûşmeya, ’Kurdistan goristana faşîstan’ bilind kirin. Li çend taxên Tehranê jî welatiyan şeva 6’ê Çileyê , bi dirûşmeyan nerazîbûnên xwe li hemberî rêjîmê anîn ziman.
Di 6’ê Çileyê de li gelek qadên Rojhilatê Kurdistanê û Îranê çalakiyên cuda berdewam bûn.
Li gorî ku hate ragehandin ku ciwanê Kurd yê berî 23 rojan li qada xwepêşandanên li Kerec bi giran birîndar bibû, li nexweşxaneyê jiyana xwe ji dest da.
Herî dawî doh hate ragehand ku rêjîma Îranê sibha 7’ê Çileyê, Muhamed Mehdî Karamî û Seyîd Muhemed Huseyînî ku bi hinceta tevlî xwepêşandanên li Îran û Rojhilatê bûne, bi dar ve kir. Weke tê zanîn ku ji destpêka serhildanan û heta niha rêjîma Îranê 4 kes bi darvekirin e. Rejîma Îranê berî niha Muhsîn Şikarî, Mecîd Riza Rehnewerd bidarve kiribûn. Serhildana li Rojhilatê Kurdistanê û Îranê didome. Di vê serhildanê de heta niha zêdetirî 500 kes hatine qetilkirin û nêzî 20 hezar kes jî hatine girtin.