Kongra Star bi daxuyaniyekê êrişa li ser jina ciwan a li Silêmaniyê pêk hat şermezar kir. Herwiha bang li rêxistinên jinan kir ku ji bo guhertina hişmendiya zayendperest têkoşînê bilindtir bikin û got, divê êrîşkar werin darizandin.
Di 31’ê Kanûna 2022’an de li taxa Hîwane ya bajarê Silêmaniyê dema ku jineke ciwan çû galeriyên wesayîd û motosikletan, komek ciwanan êrişî wê kirin û hewil dan wê qetil bikin.
Rêxistina Kongra Star a Bakur û Rojhilatê Sûriyeyê der barê mijarê de daxuyanî da
Kongra Star di daxuyaniya xwe de got, di dema ku dirûşma Jin jiyan azadî dibe dirûşma tevahî cîhanê ji cinsiyetperestî, nijadperestî û zordariyê êrişek wiha pêk hat, her wiha di dema ku di vê serdemê de jin pêşengiyê dikin û di qada şoreşê de li Rojavayê Kurdistanê jinan şoreş bi rêve dibin û li dijî DAIŞ’ê şerekî mezin dane meşandin de bûyerên wiha cihê mixabiniyê ne.
Kongra Star diyar kir ku li Rojavayê Kurdistanê û Bakur Rojhilatê Sûriyeyê jinan ji bo têkoşîna xebatên xwe domandin loma jî gelek pêşengên jin hatin hedefgirtin û wiha dewam kir: “Sala 2022’yan de ku weke saleke bi polîtîkayên qirkirinê ket dîrokê, bi hemû awayan û hemû rêbazan jin hatin hedefgirtin. Dîsa li Rojhilatê Kurdistanê û Îranê de, serhildan zêdetirî 3 mehan e berdewam dikin. Ev serhildan ji bo têkbirina hişmendiya baviksalariyê, têkbirina, netew-dewletê, olperestî û nijadperestiyê didomin. Tevî vê yekê jî rojane li hemberî jinan kiryarên xirab diqewimin. Weke bûyera ku beriya çend rojan li Silêmaniyê rûda ku 7 zilaman ku êrîş birin ser jinek ket medyaya dîjîtal.
Rêxistina Kongra Star a Bakur û Rojhilatê Sûriyeyê bûyera li Silêmaniyê bi tundî şermezar kir û wiha got: “Divê êrîşkarên ku ji aliyê asayîşa Silêmaniyê ve hatine binçavkirin, werin darizandin. Ji bo ji her kesê re bibe mînak û mafên jinan bi zagon û qanûnan were parastin. Her wiha banga me ji bo tevahî rêxistinên jinan li Başûrê Kurdistanê ew e ku di aliyê guhertin û veguhertina hişmendiya zayendperest de têbikoşin û roleke mezintir bilîzin. Dîsa em dibêjin pêvajoya jin jin azadî dest pê kiriye û em ê vê meşa bi heybet berdewam bikin heya serkeftin û azadiya tevahî civakê û têkoşîna me dê bi hevgirtina jinên cîhanê bigihîje armanca xwe.”