Navenda Nûçeyan
Tevî ku rêjîma Îranê li hemberî xwepêşanderan girtin, êşkence û kuştinê jî dike, gelên Rojhilatê Kurdistan û Îranê serhildana li dijî rêjîmî bênavber didomîne, herî dawî li bajarê Ciwanro yê Rojhilatê Kurdistanê ciwanekî Kurd di êrişa hêzên rêjîma Îranê de jiyana xwe ji dest da.
Serhildana ‘Jin, Jiyan, Azadî’ ya li Rojhilatê Kurdistan û Îranê bê navber dewam dike. 30’ê Çileya 2022’an de li bajarê Zahîdan piştî nimêja Înê bi sedan kes daketin kolanan û xwepêşandan lidarxistin. Xwepêşanderan tevî dirûşmeyên dijî desthilatê, nerazîbûna xwe hemberî cezayê darvekirinan jî nîşandan û piştgirî dan girtiyên siyasî.
Li Rojhilatê Kurdistan bajarê Pîranşarê merasîma çileya Karwan Qadir Şukrî hate lidarxistin. Di merasîmê de axaftin hatin kirin û hate gotin ku şehîdên serhildanan nîşan didin ku ew hêjayî jiyanek baştirin, jiyanek wekhevin. Herî dawî girseya gel bê navber dirûşmeya ‘Jin, Jiyan, Azadî’ qêriyan. Li bjarê Xuremawa ya Loristanê jî merasîma çileya Hisên Zerîncuyî bi pêşengiya jinan hate lidarxistin.
Herwiha li bajarê Êze ya Xuzistanê merasîma çileya Mîlad Seîdyan bi tevlîbûna sedan kes pêkhat. Li heman bajar cenazeyê Mehmud Ehmedî ku di êrişa hêzên Îranê de hatibû qetilkirin, spartin axê.
Doh li bajarê Ciwanro merasîma çileya 7 xwepêşanderên ji aliyê hêzên Îranê ve hatibûn kuştin, hat lidarxistin. Ji bo Îran rê li merasîmê bigre, hêz şand Kirmaşanê. Dema ku xwepêşanderan dest bi mersîmên çileya 7 xwepêşenderan kirin, rêjîma Îranê êrîşî wan kir. Li gorî agahiyan, di êrişa hêzên çewisandinê yên Îranê de welatiyê Kurd ê bi navê Burhan Îlyasî jiyana xwe ji dest da. Li gorî dîmenên ku li ser toerên civakî hatibûn parvekirin, li bajarê Ciwanro hêzên Îranê bi guleyan êrişî û gaza şit êrîşî xwepêşanderan kirin.
Li gorî rapora dawî ya Rêxistina Mafên Mirovan a Îranê heta niha di xwepêşandanên li Rojhilatê Kurdistanê û Îranê de 476 kes hatine qetilkirin ku piraniya wan Kurd û Belûçî ne.