Li mizgeftên girêdayî Civaka Îslamiya Kurdistanê (CÎK) bi hezaran kes ji bo şehîdên Parîsê nimêj kirin.
Li Ewropayê nêzî 50 mizgeftên girêdayî Civaka Îslamiya Kurdistanê (CIK) hene. Ji bo şehîdên Parîsê li hemû mizgeftên girêdayî CÎK’ê nimêja cinaze hate kirin. Bi hezaran kes ji bo şehîdan hatin cem hev.
Mele Eşref li Mizgefta Saîdê Kurdî ya li Bremenê nimêj da destpêkirin. Mele Eşref ji ajansa me re axivî û got, “Em li hemû mizgeftên xwe ji bo şehîdên Parîsê hatin cem hev. Me sohbet, xutbe û weaz dan. 300 kesî li mizgefta me ya li Bremenê nimêj kirin.”
Ji bo şehîdan li dehan bajarên wekî Berlîn, Hagen, Wûppertal, Essen, Denhag, Parîs, Metz û Marsîlyayê li nêzî 50 mizgeftan nimêja cenaze hate kirin.
Mele Eşref di axaftina xwe de ev tişt anî ziman: “Her sê hevrêyên me yên şehîd kedek mezin dane. Bi taybetî hatine hilbijartin. ‘Kujer negot ez derkevim qatê jor, hima kî derkeve pêşberî min ez gulebaran bikim.’ Ev hevrêyên me bi taybet ji aliyê dewleta Tirk ve hatine hilbijartin. Hevrêya me Evîn Goyî tevgera jinê temsîl dikir, hevrêyê me Mîr Perwer temsîla hunerê dikir û hevrêyê me Abdûrrahman Kizil jî welatparêzî temsîl dikir.”
‘Ji ber beşdarbûeke mezin cih nema ’
Mele Eşref da zanîn ku ew her hefte ji bo nimêja înê tên cem hev, lê dema ragihandin ku dê ji bo şehîdan nimêja cinazê bê kirin, hejmara kesên hatin du qat zêde bûye. Mele Eşref got, “Ji ber ku cih tunebû hin kesên me li derve nimêj kirin. Xwedê ji hemû gelê me razî be. Peyva Şehîd namirin, peyveke Xwedê ye. Şehîd ji aliyê fîzîkî ve dimirin, lê bi milyonan xwedî li alaya wan derdikeve. Îro li seranserê Kurdistan û Ewropayê bi milyonan kes xwedî li şehîdên xwe derketine. Ruhê yekîtî û hevgirtinê li hemû mirovên me yên ji bo nimêjê hatin, ji ber ku wezîfeyên xwe yên manewî bi cih anîn, zêde bûn. Em spasiyên xwe li hemû gelê xwe yê beşdarî nimêjê bûne, dikin.” ANF
