Navenda Nûçeyan
Bijîşka bi navê Ayda Rûstemî ya ku birîndarên serhildanên Îranê derman dikirin, 12’ê Kanûnê winda bibû û piştî rojekê jî cenazeyê wê îşkencekirîji aliyê polisên rejima îranê ve ji malbatê re hat radeskirin.
Bijîşka bi navê Ayda Rûstemî ku di serhildanên Rojhilatê Kurdistanê û Îranê de alîkariya birîndaran dikir, 12’ê Kanûnê winda bibû. Piştî rojekê cenazeyê hatibû dîtin. Polîsên Îranê agahî dabû malbatê û îdîa kiribûn ku Ayda Rustemî di qezaya trafîkê de jiyana xwe ji dest daye.
Polîsan ev agahî dabû malbatê, lê derket holê ku Ayda bi îşkenceyê hatiye qetilkirin.
Li gorî nûçeya malpera bi navê İranWire, Ayda Rustemî 12’ê Kanûnê li herêma Ekbatan alîkariya gelek birîndarên serhildanê dikir. Lê ferq kiriye ku dermanên wê kêm bûne. Lewma ji bo ku dermanan peyda bike, ji mala birîndarek derketiye û careke agahî jê nehatiye girtin.
Di heman nûçeyê de tê gotin ku rojek piştî windabûnê, polîsên herêmê li malbata Aydan geriyane û jê re gotine, “Cenazeyê keça we li morgê ye, werin bigirin”. Dema ku malbat çuye navenda polîsan jî, jê re hatiye gotin ku Aydan di qezayek tirafîkê de jiyana xwe ji dest daye.
Li ser vê yekê malbatê xwest ku cihê keça wan qeza lê kiriye bibînin, lê polîsan nîşan nedaye, her wiha malbat tehdît kiriye û gotine, “Dengê xwe nekin, bêjin keça me di qezayê de jiyana xwe ji dest daye.”
Di berdewama nûçeyê de hatiye destnîşankirin ku malbata Aydan Rustemî gefa polîsan red kiriye û li cenazeyê keça xwe nêriye. Endamên malbatê piştre jî diyar kirine ku îşkence li keça wan hatiye kirin. Kesekî nêzî malbatê destnîşan kiriye ku herdu destên Aydanê hatine şikandin, çavekê wê hatiye derxistin û wesleyên wê yên hundir hatine derxistin.
Cenazeyê Ayda Rûstemî li herêma Gurgan a girêdayî Eyaleta Gulistan a li Bakûr-Rojhilatê Îranê spartin axê.