Ahmed Aktaş
Dîsa di 13’ê de, Komisyona Yekîtiya Ewrupayê (KYE), biryarek nuh standiye ku 220 milyon dolar bidin dewleta qirker û faşist a Tirk.
Li gor biryara wan a berê, ji bo vê dewleta kujera gelê Kurdistanê, di sala 2022’an de wê 1.2 milyar dolar destekê bidin.
Jixwe li gor biryara wan a 2021’ê, divê 3 milyar dolar bidin vê dewleta mirovkuj.
Sedemê vê destekê jî wisa nîşan didin, xwedê giravî him ji bo jiyana koçbera û him ji bo misogerkirina ewlehiya sînorên dewleta Tirk ji “terorist”an e!
Bêgûman ev herdu sedem jî ne rast in. Ya rast ew e ku; ji bo parastina rêveberiya faşist û dagirker a R.Erdogan û D.Bahçeli ye, da ku baştir berjewendên dewletên Ewrupayê biparêzin û ew koçberên ku bi giranî yên Rojava û Sûriyeyê derbasî Turkiyeyê bûn e, qene derbasî Ewrupayê nebin.
Divê “mafê” vê rêveberiya kujer jî neyê paşçavkirin, ji ber ku vî erk û peywira xwe ya nokeriya YE’yê û DYE’yê û heta nokeriya Rûsyayê jî, bê qusûr pêk tîne!
Bêgûman, yê ku herî giran zerar û ziyan dîtiye û dibîne, yê ku hatiye kuştin, êş kişandiye, ketiye zîndanan, koçber bûye, talan û wêran bûye, gelê Kurdistanê ye. Taybet jî gelê me yê Rojava ye.
Durûtiya van dewletên hegemon û desthilatparêz ewin yên ku dibêjin; “Em mafên mirovan diparêzin, em aramî, aşitî û demokrasiyê û hwd. Dixwazin in”
Bê şerm aşkere dibêjin “ewlekariya sînorên dewleta Tirk giring e û mafdar e ku ewlehiya xwe biparêze” û hwd. Jixwe ew J.Jeffre’yê nûnerê DYEyê ku niha li Tirkiyeyê aqilmendiyê ji R.Erdogan re dike, dibêje; ”Bejayî nekevin Rojava, belê bi taybet li cihên giring bixin”…
Ewlehiya gelê Kurdistanê-Rojava li kuderê ma? Ma gelo ew ne mirov in, ma we mafên mirovan(xwedêgiravî bêferq û cudahî) ne diparastin?
Ka em, topbaran û bombebaranên wan ên li ser gund û bajar û bi giştî li ser mirovên welatê me bidin rexekê, ma gelo astengiya AVA ELOKÊ jî hûn nabînin, nabihîzin û hûn qet şerm jî nakin? Her wiha ewqas çekên kimyewî û xazên jahrî yên tên bikaranîn jî, hûn nabînin?!
Guh û çavên xwe, li êrîşên dijî mirovahiyê girtine, nabihîzin û nabînin. Xema wan tinê ewlehiya dewleta Tirk û dewletên wan in. Mirovparêzî û demkorrasiya wan jî ewqas e!
De wa ye, ew qirêj û gemara di nava rêveberiya Tirk de ya ku nav û dengê wê gihiştiye erd û ezmanan, gihişt Parlemena wan a herî bilind PE’yê . Li gor nûçeyan, ji 5 endamên PE’yê, ji ber bertîlxwarinê/gendeliyê lêpirsin hatiye despêkirin û ji kar hatine avêtin. Ka kengî dawî li van polîtîka û karên kirêt û neqenc tê ne diyar e(xwedê zane!).
Bê gûman, ev siyaset û kiryarên dujminên mirovahiyê, li hêviya xwedê an jî li hêviya dilrehmiya kûjeran nayên hiştin.
Divê yên zulum li wan tên, ên mafên wan tên xwarin, bi kurtayî yên mezlûm, bi taybetî jî gelê me yê Kurdistanî, ji bo rizgarbûn û azadbûna xwe, him netewî him navneteweyî, rêxistinbûyîna xwe xurtir bikin!