Navenda Nûçeyan
Li dijî tecrîda girangirî ya li ser Rêberê gelê Kurd Abdullah Ocalan, li Kobanê, Til Temir, Eyn Îsa û Qamişlo çalakî hatin lidarxistin
Rêzeçalakiyên li dijî tecrîda li ser Rêberê Gelê Kurd Abdullah Ocalan dewam dikin.
Yekîtiya Jinên Ciwan a Herêma Firatê ji bo protestokirina tecrîdê girankirî ya li ser Rêberê Gelê Kurd Abdulah Ocalan bi dirûşmeya, “Ciwan fedaiyên Rêber Apo ne” komxebatek li dar xist. Di komxebatê de hat diyar kirin ku saziya CPT ku qaşo ji bo mafên bindestan hatiye avakirin, bûye MÎT’a dewleta Tirk û xwe ji van kiryaran re ker kiriy. Her wiha di komxebatê de hat destnîşan kirin ku heta tecrîda li ser Rêberê gelê Kurd Abdullah Ocalan bê şikandin wê ciwan û gelên herêmê li ber xwe bidin.
Herwiha bi heman armancê bi sedan şêniyên navçeya Eyn Îsa bi xwepêşandanekê daxwaza azadiya fîzîkî ya Rêber Ocalan kir. Xwepêşandan ji aliyê Tevgera Ciwanên Şoreşger ên Sûriyê ve hat organîzekirin û bi sedan şêniyên navçeya Eyn Îsa û koçberên Girê Spî beşdarê bûn. Di xwepêşandanê de pankertên bi nivîsên “Azadiya Rêber Ocalan misogeriya azadiya gelan û kilîta çareseriya aloziya li herêmê ye” û wêneyên Rêber Ocalan hatin bilindkirin. Di xwepêşandanê de li ser navê Tevgera Ciwanên Şoreşger ya herêma Feratê axaftin hatin kirin û xwepêşandan bi dirûşmeyên mîna “Bê serok jiyan naba”bi dawî bû.
Herwiha Îro ji aliyê Tevgera Xwendekarên Demokratîk pêşangehek li hola Zanîngeha Rojava ya li bajarê Qamişlo hat vekirin. Di pêşangehê de pirtûkên Rêber Ocalan û yên girêdayî tevgera azadiyê ya Kurdistanê û tabloyên ku wêneyên Rêber Ocalan li ser hatine xêzkirin, hatin pêşandan.
Li Til Temrê jî Tevgera Hîlala Zêrîn û Tev-Çanda çalakiyek li dar xist. Çalakî bi xwendina daxuyaniyê ji aliyê Rêvebera Tevgera Hîlala Zêrîn a Til Temirê ve hat destpêkirin. Di daxuyaniyê de tecrîda girankirî ya li ser Rêberê Gelê Kurd Abdullah Ocalan hat şermezarkirin.
Paş re ji bo Rêberê Gelê Kurd Abdullah Ocalan stran û helbest hatin gotin, herwiha şanoyek bi navê “Dem dema azadiyê ye” hat pêşkêşkirin. Çalakî bi dirûşmeya ’Bê Serok Jiyan Nabe’ bi dawî bû.