YPGʹê bi daxuyaniyekê ragehand ku şervanên wan Dilxwaz Agir û Hisên Mamed 3ʹyê Kanûnê di êrişa hewayî ya dewleta Tirk a dagirker a li ser navçeya Amûdê de şehîd bûne.
Navenda Ragihandinê ya Yekîneyên Parastina Gel (YPG) bi daxuyaniyekê nasnameyên 2 şervanên YPGʹê yên ku di êrişa hewayî ya dewleta Tirk a li ser navçeya Amûdê de şehîd bûbûn, eşkere kirin.
YPG’ê diyar kir ku di 3’yê Kanûnê de li ser rêya Amûdê nêzî gundê Raya balafira keşfê a dewleta Tirk a dagirker seyareyeke ku 2 hevrêyên wan têde bûn, kir hedef. Di encama êrişê de hevrêyên wan Dilxwaz Agir û Hisên Mamed şehîd ketin.
YPG’ê da xuyakirin ku dewleta Tirk a dagirker di çarçoveya konsepta ku serî de qirkirina gelê Kurd û gelên azadîxwaz a herêmê kiriye hedef bi salan e êrişên cir bi cur li ser axa me pêk tîne û wiha got: “Ji sala 2021’an ve êrişên xwe bi zêdetir bi balafirên keşfê hem şervan û hem jî gelê me yê sivîl dike hedef û êrişan lidar dixe. Ji 19’ê şeva Mijdarê ve jî bi seranserî axa Bakûr û Rojhilatê Sûriyê bi balafirên şer û keşfê bûye hedefa dewleta Tirk a dagirker. Hinceta van êrişan bi temamî li ser mayîn û berdewamîya îqtîdara AKP û MHP’ê ye. Êrişa dawî a li ser seyareya hêza me jî di vê çarçoveyê de ye”.
Navenda Ragihandinê ya Yekîneyên Parastina Gel (YPG) da xuyakirin ku hevrêyê wan Dilxwaz Agir û Hisên Mamed ji deverên cûda ên xaka Kurdistanê bûn, li ser armanca azadîya gelê Bakur û Rojhilatê Sûriyê hatin gel hev û bûn têkoşerê gelê xwe , li hember gel û dîrokê xwe berpirsyar dîtin û ji bo azadîyê barê giran ê şoreşê girtin li ser milên xwe û got: “Her du hevrêyên me yên hêja ku mêrxasên gelên me ne, di jiyana xwe ya şoreşgertiyê de di her şert û mercê de ji her karê re amade bûn. Erk û berpirsyartiyên xwe li hember gel û dîrokê bicîh anîn. Şehadeta her du hevrêyên me wê di têkoşîna me ya azadiyê de hêz bide me û armancên wan hevalan da ku pêk bînin emê bi têkoşînekê hîn baştir û xurttir bidin meşandin. Em di serî de ji malbatên hêja yên şehîdên xwe û gelê xwe re sersaxiyê dixwazin.”