Navenda Nûçeyan/Qamişlo
Ji bo şermezarkirina tecrîda li ser Rêberê gelê kurd Abdullah Ocalan û êrişên dewleta Tirk yên li dijî herêmên bakur û rojhilêatê Sûriyê, bi diruşmeya “Bi Rihê Zap, Avaşîn û Metîna Emê Tecrîdê bişkînin û Kurdistana Azad Misoger Bikin” îro saet 11`an şêniyên bajarê Qamişlo meşek li dar xistin.
Meş ji çerxereya Sewami(depoyê genim) yê li taxa Enteriyê dest pê kir û heta çerxerya Efrîn dewam kir.
Di Meşê de tevayiya gelê Qamişlo, Herwiha endamên saziyên sivîl, saziyên jinan, Tevgera Ciwanên Şoreşger, Yekitiya Jinên Ciwan beşdar bûn.
Beşdaran wêneyên Rêber Abdullah Ocalan, ala PKK`ê bilind kirin û siloganên bê serok jiyan nabe, bijî berxwedana gerîla digotin.
Piştî ku beşdaran li çerxereya Efrîn kom bûn, deqeyeke rêzgirtinê li ser giyanê şehîdan sekinîn û li ser navê Rêxistina Ciwanê Şoreşger Şêrhat Ehmed axivî.
`Emê her demê banga azadiya Rêberê xwe bikin`
Rêveberê Rêxistina Ciwanê Şoreşger Şêrhat Ehmed tecrîda li ser Rêber Abdullah Ocalan şermezar kir û wiha pê da çû: “23 sal in Rêber Abullah Ocalan di zindanê de ye û ev demek dirêje em rewşa wî nizanin. Ev jî gumanên me zêde dike, ji bo wê jî pêwîste em rewşa serokê xwe bizanibin. Wek gelê û ciwanên bakur û rojhilatê Sûriyê emê her demê banga azadiya Rêberê xwe bikin, herwiha hêz û fikrê ku rêbertî di me çandiyê emê xurttir bikin û brxwedanê geştir bikin. Herwiha em dibêjin; Pêwîste tevayiya pêkhateyên li bakur û rojhilatê Sûriyê doza azadiya Rêber ApO bikin, lewra Rêber Abdullah Ocalan, ne Rêberê gelê kurd tenê rêberê tevayiya gelên azadîxwaze.”
`Emê doza şehîdên xwe pêk bînin`
Şêrhat Ehmed di dawiya axaftina xwe de got, heta dilopek xwîn di laşê me de hebe emê piştgir û parastvanên doza azadiyê bin û emê doza şehîdên xwe pêk bînin. Lewra bi saya şehîdan û berxwedêran em bi ser ketin û emê hertim bi serbikevin. Raste em bi hezaran şehîd didin, lê li şûna her şehîdekî wê bi sedhezaran şervanên azadiyê çêbibin û li şûna her gerîlayekî wê bi sedhezaran gerîla çêbibin.