Hafiz Ahmet Turhalli
Kurd û Kurdistan bi hezarê salan e dibin êrîşên dagirkeran de ne. Welatê me yê Pîroz, hatiye dabeşkirin û gelê me hatiye perçiqandin. Bi taybet kesên ji xwe re dibêjin em bawermendên ola Îslamê ne, xaka me dagirkirine û piştgiriya wan jî hêzên sereke yên li cîhanê desthelatin, dikin. Wek gel, me gellekî êş û azar ji destên dagirkerên xwe kişandiye û em hêjî dikşînin.
Me di dîroka xwede gellekî şaşî kirin e, parastina xakê her çiqasî me pêk anîbe jî, wek gel me bihevre hemû xaka welatê xwe neparastiye. Serhildan çêbune, carna xwebirêvebirin jî çebûye, lê mixabin berdewam parastina xak u gel çênebûye. Hişmendiya parastina xakê, di mêjîyên me de birêkûpêk cîh negirtiye, dabeşkirina xaka me, buye sedem ku, mêjiyê me Kurdan jî parçe û dabeş bibe. Welatê me kirine çar pênc perçe, lê mêjiyên me kirine hezar perçe. Di gotin û karkirinên me Kurdan de, ji bo welat û xak; partî, civak û dezgeyên ji hêla Kurdan ve tên avakirin jî, pêşî li vê perçebunê negirtine û hêjî gelek ji partî û dezgeyên bi navê Kurd û Kurdîstanê kar dikin vê perçebunê didomînin. Wek mînak: Dibêjin Kurdîstana Iraqê, Îranê, Suriyê û Tirkiyê. Di rastiyê de Kurdistan her yeke! Li perçeyek welat qiyamet radibe, perçeyên din li gor pêwistiyê welatperwerî tevnagerin. Di dîroka me ya dûr de ev bi gelemperî pêş neketiye û di dîroka me ya nêz de jî, ji bilî PKK kesekî bi dengekî bilind û karekî bi rêkûpêk ji bo yekitiya xak û gel bi giştî pêşnexistiye. PKK dijî pêşxistina perçebunê ji bîrdoziya xwe de û karkirinên xwe de, giringiya yekitiya xak û gel, gelekî kar kir. Bi êrîşên DAÎŞ’ ê li ser hemû parçeyên xaka pîroz karekî berbiçav hate kirin û xwîna zarokên hemû parçeyên Kurdistanê di heman êniyê de hate rêtin. Ev ji bo xak û gelê me û yekitiya wî bû bingehekî girîng. Tovên yekitiyê ên bihêz hatin çandin, li dijî perçebunê ev tov şîn bûn û ev şînbûn jî berdewame.
Ji ber ku gelên cîhanê yekitiya xak û gelê xwe pêkanîne serkeftin û dilxweşîya cîhanê dijîn.
Li Başurê Kurdîstanê li navçeya Zaxo henek kesên sivîl û zarok ji hêla dewleta Tirk ve hatin qetil kirin, Ereban qiyamet rakirin. Di Ukrayna û hemû cîhanê de em dibînin ku yekitiya ser xak û gel kare gelek tiştan bi xwe re biguherîne. Duçarbûna zilm û zordariyan ne çarenuse, bi yekitiya gel û parastina xaka pîroz em karin vê çarenusê biguherînin! Neha li Rojava û Rojhelat êrîşên qirkirinê hene, lê ji bo parastina gel û xaka xwe divê em karekî serkeftî pêk bînin. Kesên Misilman dibêjin, ev ne meseleyeke olî ye, belê parastina xak û gel meseleyeke Olî ye û li ser kesê Misilman ferze kû parastina xak û gel bike. Parastina xak û gel li ser hemû Kurdan ferze û bêdeng mayîn heram e. Ev ferza han kê bicîh neyîne li dunyayê rûswatî li axretê jî agirê cehennemê benda wî ye. Qur‘an: ‚Ji were destûr hat dayîn hûn karin xwe biparêzin‘. (Hec 39) ‚Kesê we ji xaka we derdixe, hun jî wan derxînin, kesê we dikuje hun jî wan bikujin‘. (Beqere 191)
Belê Êrîşên qirkirinê ser xak û gelê me zêde bune. Neha dema yekîtî û bihevre karkirinê ye.
