Farûk Sakik
Di êrişên dewleta Tirk a dagirker de gelek kod hatin tevlihev kirin. Herkesî li gorî xwe hin analîz û şîrove kirin. Di serdema îro de analîzên tu kesî rast dernayên. Ji bo ji berê de texmînkirina siyaseta Rojhjilata Navîn, îhtimalek wek girtina toto-lotoyê ye. Ev demek dirêj e me ji tu kesî nebihîst ku bivêje “min gotibû”.
Dibejin xeyalên Erdogan yên Neo-Osmanî hene, ji bo pêk bîne êriş dike. Heger li du vî xeyalî be, sînorê xeyalê wî di nav axa gelek dewletan de derbas dibe, çima êrişî wan dewletan nake.
Dibêjin Erdogan li ber têkçûnêye û ji bo bandore li dengê nîjadperestan bike êrişî Rojava dike. Komkujiya Taqsîm kir hincet ku êrişî Rojava bike. Na..pêdiviya wî bi hincetek hîç tuneye. Bê sedem dikare êrîşî Kurdistanê bike.
Kodên Teqîna Taksîmê yek bi yek zelal dibin. Her çiqas ji Qesra Spî di daxuyaniyek de hatibe gotin ku hên jî ew teqîn zelal nebûye, lê hemû agahî di destê îstixbarata wan de hene û dibe ku van agahiyan bi raya giştî re par veke da ku nebe sedema teqîn û komkujiyên nû. Ez baş dizanim ku wê ji bo berjewendiyên xwe ji bo li hemberî Tirkiyê wek qozek bi kar bîne niha li koşeyek hiştiye. Ev li dera hanê kodên hilbijartina jî negirt. Ji bo hin kesên ji xwe re dibêjin hunermend wek Efrînê li kêleka wan cîh nagire.
Sedemeke din a êrişên dagirkeriyê; dixwazê li hemberî gerîlayên kurdan têkçûna xwe ya van du salên dawî, bi serkeftineke sexte, bi fotografeke sexte bide veşartin. Di vî şîroveyê de min jî texmînek ku nerastbû kir. Dewleta Tirk a dagirker bixwaze hertim dikare serkeftinek sexte biafirîne.
Mînakek em bidin di sala 2016’an de li Tirkiyê darbeyek çêdibû destûr da û şopand. Êvara darbeyê Erdogan di kanalek televîzyonê de fotografê qehremaniyê belav kir. Ev çend sala li wê axê bû dîktator. Li dijî zilimkariya wî kê derxist, wek dijmin, terorîst û ajanê dewletên dijminan îlan kir û ew avêtin zîndanan.
Wek vê darbeyê, wî dizanibû ku wê li Taksîmê teqînê pêk were. Ev agahî di dest wan de hebû. Dema ku Erdogan îşaretên bi rejima Şamê re da, hin rêxistin û komên çete li dijî vê yekê derketin. Erdogan ji wan re El Nûsra alternatif nîşan da. Wan komên çete jî li Taksîmê bi teqînek wê alternatîfa xwe nîşan bidana. Istixbaratê got em ê jî vê teqînê bikin hincet û bikevin Rojava. Û wisa kirin. Dema ku teqîn pêk hat Erdogan û Soylu plana xwe xistin meriyetê.
Em derbasî texmînên berî êrişên 19’ê mijdarê bibin. Digotin Amerîka û Rûsya wê destûra hewayî nedin. Digotin, şerê Ûkranya heye, Rûsya destûr bide jî wê Amerîka li dijî derkeve. Nebû. Gotin, Rûsya li ser nave rejima Şamê wê destûr nede ku dîsa axa wan were dagirkirin. Nebû. Rûsya, Amerîka û Şam bihevre destûr dane dagirkeriya Tirkiyê.
Herkesî digot, Kobanê wijdana mirovahiyê û navenda têkoşîna li dijî DAIŞ’ê ye. Di peymana Enqerê ya di sala 2019’an de hatî parastin. Di peymanê de ji Tirkiyê re dihat gotin; bi ti awayî nekevin Kobanê. Lê ji niha de berî ku êrişên bejayê dest pê bikin, bajarok û gundên Kobanê yek bi yek têne bombekirin. Dijmin dixwaze bi van topbaranan kaosê çêke û da ku gel ji herêmê vekişe, ew jî çeteyan xwe bîne li van herêman bi cîh bike.
Lê di yek tiştî de em tu caran di texmînên xwe de xelet derneketin. Dewleta Tirk kurdan wek dijmin dibîne û dixwaze tune bike. Ev rast e.