Ji bo piştgirîdayîna serhildana gelên Îranê, jinên Belûçistanê xwepêşandanek li dar xistin û dirûşmeya `JIN JIYAN AZADÎ` bi yek dengî avêtin.
Navenda Nûçeyan
Bi qetilkirina keça Kurd Jîna Emînî ya 22 salî, li tevayiya bajarên Rojhilatê Kurdistanê û gelek bajarên Îranê agirê serhildanê vêket û ev serhildan heta roja îro jî bi awayekî berfireh dewam dikin. Rêjîma Îranê jî li hemberî xwepêşandanên gel xwe negire û li dijî xwepêşandanan kuştin, şidet û binçavkirinê dike.
Li eyaleta Sîstan-Belûçistan ji bo piştgirîdayîna serhildana gelên Îranê, jinan xwepêşandanek lidar xistin .
Li gorî dîmenên ku li torên civakî belav bûne, bi dehan jinên ku cil û bergên Belûcî li xwe kirine li Sîstan-Belûcistanê, pankartên bi nivîsa “Jin Jiyan Azadî” li ser nivîsandî, ji bo piştgiriya serhildana gel bilind kirine.
Bi destpêkirina serhildana gel a ku piştî kuştina jina ciwan a Kurd Jîna Emînî ji aliyê polîsên exlaq ve derket, li Sîstan-Belûçistanê nêzî 120 kes hatin qetilkirin.
Di berdewamiya serhildanê de bi dehan xwepêşander li gelek bajaran daketin qadan û dirûşmên li dijî rejîmê avêtin.
Li gorî agahiyên ku hatine belavkirin, hêzên ewlehiyê bi guleyan êrîşî xwepêşanderan kirine û gaza rondikrêj jî ji bo belavkirina xwepêşanderan bi kar anîn.
