Navenda Nûçeyan
KONGRA-GEL diyar kir ku bi PKK’ê gelê Kurd hat rêxistinkirin, perwerdekirin, şoreşeke civakî hate kirin, hêvî û baweriya gel çêbû û got, pêwîste em li ser bingeha têkbirina faşîzmê bi tekoşîneke heybet seferber bibin“
Bi wesîleya salvegera 44’an a damezrandina PKK’ê Dîwana Hevserokatiyê ya KONGRA-GEL daxuyaniyek weşand.
KONGRA-GEL di daxuyaniya xwe de diyar kir ku berî têkoşîna Rêber Apo dîroka Kurdistanê ji ber serneketin, têkçûn, teslîmbûn, xiyanet, bêhêvîtî û ji ber pişaftinê reş û tarî bû. Ji Kurdbûnê rev hebû. Têkoşîna Rêber Apo, qebûlnekirin û mudexale kirina vê rewşa gelê Kurdistanê ye.
KONGRA-GEL da xuyakirin ku têkoşîna Rêber Apo; ji bo gelên Kurdistanê ji tarîtiyê derketina ronahiyê ye, ji tunebûnê derketina hebûnê ye û wiha got: “Bi PKK’ê gelê Kurd hat rêxistinkirin, hat perwerdekirin, şoreşeke civakî hate kirin. Hêvî û baweriya gel çêbû. Bi hezkirina gel û welat, ji bo azadiyê ruhê fedayitiyê, ruhê ‘Kurdên azad’ çêbû. Ji ber vê yekê jî rojbûna PKK’ê rojbûna ‘Kurdên azad’ e”
KONGRA-GEL da zanîn ku PKK partiya jinê ye û wiha dewam kir: “Jina Kurd, bi Rêber Apo û PKK’ê rastiya xwe nas kir. Bi şoreşeke civakî, bi bîrdoziya azadiya jinê, bi artêşbûn û partîbûnê, jina Kurd bû pêşengê şoreşa azadiya gelên Kurdistanê. Şoreşa jinê li Kurdistanê destpê kir, belav bû li Rojhilata Navîn û tevayî cîhanê.”
KONGRA-GEL diyar kir ku Ji ber ku konsepta dewleta Tirk a siyasî û a eskerî ya dijî gelê Kurd û PKK’ê bê encam ma, girêdayî provakasyona Taksîmê ku plana wana bi xwe bû, bi êrişên 19’ê Mijdarê li ser Başûr û Rojava’yê Kurdistanê xwestin rojeveke li gorî xwe çêbikin û wiha got: “Em wek gel û dostên me baş bizanibin ku heta rejîma faşîst têk neçe, ev êrişên dijminane wê dewam bikin. Pêwîste em jî li ser bingeha têkbirina faşîzmê bi tekoşîneke heybet seferber bibin”.
KONGRA-GEL da xuyakirin ku paradîgmaya Rêber Apo di pêşengtiya jinê de bi duruşma jin- jiyan- azadî li Rojhilatê Kurdistan, Îran, Rojhilata Navîn û tevayî cîhanê de bûye hêvî, Ji bo azadiya gelên Kurdistanê û demokrasiya herêmê, ji hemû deman zêdetir a naha derfet heye û wiha dewam kir: “Êdî dem dema azadiya Rêber Apo û gelên Kurdistanê û demokrasiya gelan e. Di vê demê de wek gel û dostên me, pêywira me ya sereke ew e ku ji bo azadiya Rêber Apo, ji bo têkbirina faşîzma AKP- MHP’ê, ji bo li hemberî çekên kîmyewî ya dewleta Tirk û bêdengiya Ewropayê, pêwîste ji hemû deman zêdetir em niha seferber bibin. 50’emîn sala têkoşîna ya Rêber Apo û ya PKK’ê em bikin sala azadî û demokrasiya gelan.”
