Navenda Nûçeyan
Serhildanên gel yên li Rojhilatê Kurdistan û Îran bê navber dewam dikin, Roj bi roj serhildan firehtir dibin û hejmara welatiyên li ser destê rêjîma Îranê tên qetilikirin, desteserkirin û girtin zêde dibin.
Bi qetilkirina keça Kurd Jîna Emînî ya 22 salî, li tevayiya bajarên Rojhilatê Kurdistanê û gelek bajarên Îranê agirê serhildanê vêket û ev serhildan heta roja îro jî bi awayekî berfireh dewam dikin. Rêjîma Îranê jî li hemberî xwepêşandanên gel xwe negire û li dijî xwepêşandanan kuştin, şidet û binçavkirinê dik. Xwepêşandanên li Rojhilatê Kurdistan û Îranê ku bi daxwaza azadî û jiyanê dest pê kir gihişteiye asteke nû û li her derê Îranê û Rojhilatê Kurdistan belav bûye.
Li gorî Rêxistina Mafê Mirovan û çavkaniyan, ji destpêka xwepêşandanên li Rojhilatê Kurdistan û Îran heta niha zêdetirî 350 kesan hatine qetilkirin, ku ji wan 50 jî zarokin. Sindoqa Alîkariya Zarokan a Neteweyên Yekbûyî (UNICEF) di rapora xwe ya herî dawî de bang kir ku divê hedefgirtina zarokan bi dawî bibe.
Di 18 Mijdarê de li bajarên Mihabad, Kamyaran û Sine merasîma spartina xakê ya hinek xwepêşanderên di xwepêşandanan de jiyana xwe ji dest dayîn veguherî xwepêşandanek mezin û gelek dirûşmeyên li dijî rêjîmê hatin berzkirin. Herwiha li bajarên Xoy, Urmiye, Pîranşar, Serdeşt, Bokan, Mihabad, Seqîz, Merîwan, Dîwandere, Kamyaran, Sine, Bîcar, Dêwlan, Pawe, Serpêlî Zehaw, Sehne û Îlamê bi pêxistina agir û girtina rê li trafîkê xwepêşandan û çalakî hatin li darxistin. Heman demê de dirûşmeyên ‘Jin, Jiyan, Azadî’ û ‘Mirin ji bo dîktator’ hatin berzkirin. Li gelek gundan bi taybet gundên Serdeşt, Sine, Kamyaran û Dêwlan xwepêşandan û çalakî hatin li darxistin.
Li bajarê Sehne bi hezaran kes ji bo tevlîbûna merasîma salvegera koça dawî ya hunermendê navdar yê Yarsaniyan Seîd Xelîl Elî Nejad, kombûn. Lê hêzên ewlekariyê êrişî girseyê kir û ew jî merasîmê vegerand xwepêşandanê. Li gorî çavkaniyan di encama xwepêşandanên 18 Mijdarê de yên li bajarên Bokan, Pîranşar û Mihabadê de herî kêm 4 xwepêşander jiyana xwe ji dest dane. Herwiah li gelek bajarên Sîstan û Belucistanê; Zahîdan, Êranşehîr, Rasik, Xaş, Peşîn, Çabehar, Aşar û Serawan meş û xwepêşandan hatin li darxistin. Heman demê de li bajarên Tehran, Qezwîn, Tewrêz, Bender Ebas, Şîraz, Îze, Semîrom, Erdebîl, Babol, Xumeyn, Bender Deyir û hinek navçeyên din yên Îranê çalakiyên cuda cuda berdewam bûn.
