Navenda Nûçeyan
Dîwana Hevserokatiyê ya KONGRA-GEL diyar kir ku hikumeta AKP-MHP’ê desthilatdariya xwe li ser şer û xwînê dewam dike û got, êrîşa li Stenbolê ya 13’ê Mijdarê planeke tarî ya faşîzma AKP û MHP’ê ye.
Dîwana Hevserokatiyê ya KONGRA-GEL derbarê êrîşa bombeyê ya li Stenbolê daxuyaniyek da û têde diyar kir ku ev teqîn ji aliyê desthilatdariya tarî ya AKP-MHP’ê ve hatiye kirin.
KONGRA-GEL diyar kir ku eşkere ye ku komkujiya Taksîmê konsepteke şerê taybet a hikumeta AKP-MHP’ê ye û mîna komkujiyên beriya niha li Enqere-Gar, Riha-Pirsûs, Amed, Dîlok û Mersînê bi destê DAÎŞ’ê hatin kirin, ev komkujî jî dewama heman konseptê ye.
KONGRA-GEL da xuyakirin ku çekên kîmyewî yên ku hikumeta şer a AKP-MHP’ê li hemberî gerîlayên azadiyê bi kar tîne, di nava raya giştî de bû sedema nerazîbûneke mezin û wiha got: “Hikumeta AKP-MHP’ê ku di şerê qirêj de xitimî ye, dîn û har bûye. Di dîmenan de yên ku li çapemeniyê hatin weşandin, hate dîtin ku cenazeyên leşkerên Tirk ên di şer de mirine çawa ji aliyê artêşê ve hatin şewitandin.Ev hemû asta hovîtiyê ya polîtîkayên hikumeta faşîst a AKP-MHP’ê, rûyê wan ê qirêj û bi xwîn, tengaviya wan a di şerê qirêj de radixin pêş çavan”.
KONGRA-GEL da zanîn ku bûyera li Taksîmê planeke şerê taybet e ku hikumeta AKP-MHP’ê bi rêya vê yekê dixwaze rewşa xwe ya xitimandî ji holê rake, rojeva raya giştî ya li ser çekên kîmyewî û şewitandina cenazeyên leşkeran biguherîne, îmaja erênî ya têkoşîna azadiyê ya jinê bişikîne û Rojava bike hedef û hincetê ji êrîşên nû re amade bike.
`AKP-MHP’ê desthilatdariya xwe li ser şer û xwînê dewam dike`
KONGRA-GEL diyar kir ku faşîzma AKP-MHP’ê dijminê mirovahiyê ye, mejiyekî bêrehm e û wiha dewam kir: “Ji bo armanca xwe bi ser bixîne her rê û rêbazê bi kar tîne, siyaseteke bi xwîn a bêwijdan û bêexlaq e ku dikare gelê xwe, mirovên sivîl bi hêsanî qetil bike. Bûyera Taksîmê ev yek careke din nîşan da, ku hikumeta AKP-MHP’ê desthilatdariya xwe li ser şer û xwînê dewam dike.”
KONGRA-GEL da zanîn ku ji bo rastiya komkujiya li Taksîmê eşkere bibe divê her kes bi berpirsyarî rabe. Ronîkirina komkujiya Taksîmê wê pêşî li ronîkirina komkujiyên din jî veke ku ji aliyê desthilatdariya tarî ya AKP-MHP’ê ve hatin kirin.
Em careke din komkujiya li Taksîmê şermezar dikin, sersaxiyê ji malbatên kesên jiyana xwe ji dest dane û şîfayê ji birîndaranr e dixwazin.”