Darîn Silê/Qamişlo
Ji bo şermezarkirina êrişên dewleta Tirk yên kîmyawî yên li dijî qadên gerîlayên azadiyê, bi diruşmeya “Bi Vîna Gelan û Gerîla Em ê Li Hember Çekên Kîmyewî Li Ber Xwe Bidin, Dagirkerî û Îxanetê Têk Bibin” îro saet 10`an gelên herêma Cizîrê li Qamişlo xwepêşandaneke girseyî li dar xistin.
Xwepêşandan ji sê cihan dest pê kir (Ji çarxerêya taxa Siyahî, Nexweşxaneya Ferman û Mizgefta Qasimo ya li taxa Xerbî û heta stada Şehîdên 12`ê Adarê dewam kir.
Di xwepêşandanê de tevayiya gelên navçe û bajarokên kantona Qamişlo (Dêrik, Rimêlan, Girkê Legê, Tirbespiyê, Çilaxa, Til Koçer, Til Birak, Til Hemîs, Amûdê û Qamişlo) û ji navçe û bajarokên kantona Hesekê (Şedadê, Hol, Til Temir, Dirbêsiyê, Zirgan, Hesekê) beşdarî bûn.
Herwiha endamên saziyên sivîl, saziyên jinan, Tevgera Ciwanên Şoreşger, Yekitiya Jinên Ciwan, partiyên siyasî yên kurdî, erebî û suryanî, nûnerên deste û meclisên Rêveberiya Xweser ya Demokratîk ya Herêma Cizîrê û rûspiyên eşîran jî beşdar bûn.
Beşdaran wêneyên Rêber Abdullah Ocalan, gerîlayên ku bi êrişên kîmyewî li Herêmên Parastina Medyayê şehîd bûne, alên PKK`ê û alên rêxistinên siyasî û civakî yên Bakur û Rojhilatê Sûriyê bilind kirin.
Piştî ku beşdaran tev li stada Şehîdên 12`ê Adarê kom bûn, deqeyeke rêzgirtinê li ser giyanê şehîdan sekinîn û gerîlayên ku di êrişên kîmyewî de şehîd ketin bi bîr anîn.
Hêza gelan, gerîla û jinan ji çekên we xurttirin`
Piştre li ser navê Desteya Serokatiya Partiya PYD’ê Foza Yûsif axivî û got, bi navê tevayiya gelê Netewa Demokratîk yên Kurd, Ereb, Suryan û Turkman em hatine vêderê da em hovîtî û dagîrkeriya dewleta tirkî, herwiha bikaranîna wê ji çekên kîmyewî re şermezar bikin. Em ji dijminê xwe re dibêjin ev tol û berxwedanî bi çekên we yên qirêj tune nabin, hêza gelan, gerîla û hêza jinan ji çekên we bihêztirin. Çawa ku Sedam li Helebçe nikarîbû kurdan têk bibe, niha Erdogan jî nikare vîna gelê Kurd û geîlayên azadiyê têk bibe.
Foza di berdewamiya axaftina xwe de bang li civaka Navneteweyî kir û got, bêdengiya we û helwesta we ya ku hun li hember gelê kurd didin nîşandan bxtreşiyeke û sûcekî li dijî mirovayiyê ye. Ji bo wê jî ker û lalbûna civata Navneteweyî wijdansiziyeke mezine. Em vê yekê bi navê gelan û jinan şermezar dikin.
Foza di dawiya axaftina xwe de destnîşan kir ku wek gelê bakur û rojhilatê Sûriyê ewê li kêleka gerîlayên xwe bin, lewra gerîla rometa gelên azadîxwaz îfade dike û li hemberî tundî û qirkirinê parastina gelan dike.
Li şûna her gerîlayekî wê bi sedhezaran gerîla çêbibin
Herwiha li ser navê Saziya Malbatên Şehîdan Hecî Şerîf Tahir jî axivî û got, bi saya şehîdan û berxwedêran em bi ser ketin û emê hertim bi serbikevin. Raste em bi hezaran şehîd didin, lê li şûna her şehîdekî wê bi sedhezaran şervanên azadiyê çêbibin û li şûna her gerîlayekî wê bi sedhezaran gerîla çêbibin.
Hecî Şerîf Tahir di dawiyê de got, wek malbatên şehîdan em tevayiya şehên azadiya bi bîr tînin û em dibêjin, heta dilopek xwîn di laşê me de hebe emê piştgir û parastvanên doza azadiyê bin û emê doza şehîdên xwe pêk bînin.
Xwepêşandan bi stiranên Koma “Awazên Çiya” ya hunerî bi dawî bû.
