Dîlyar Cizîrî
1’ê Mijdarê salvegera roja Kobanê ya Cîhanê ye. Ev roj, ji bo Bakur û Rojhilatê Sûriyayê, gelê kurd yê li çar aliyên welat û yê derve, pêngaveke dîrokî ya serkeftinê ye. Di wê rojê de derbeyek mezin li DAIŞ û piştevanê wê dewleta Tirk a dagirker, ket.
Di heman demê de 1’ê Mijdarê bû pêngava naskirina îrade û tekoşîna gelê Bakur û Rojhilatê Sûriyê. Di encama pêngava vê rojê de Koalîsyona Navdewletî jî neçar ma ku dest bi hevkariya şervanên vê herêmê bike.
Li aliyê din di encama berxwedan û tekoşîna wê rojê de, deriyên dîplomasî û qadên xebatê yên mezin ji siyasetmedar û dîplomatên herêmê re hatin vekirin. Li ser wî esasî Rêveberiya Xweser ya Bakur û Rojhilatê Sûriyê tevî êriş, dorpêç û planên mezin ên li ser asta welatan têne kirin, li ber xwe dide û gavan diavêje.
Dema em behsa van gavan dikin û 1’ê Mijdarê (Roja Kobanê ya Cîhanê) bibîr tînin, lazime demildest em YPG/YPJ’ê jî, bibîr bixin. Şervanên vê hêzê bi piştgiriya gêrîlayên HPG’ê û ciwanên ji 4 aliyên welat, hêmanên vê rojê xêz kirin û li pêşiya Kobanê û tevahî Bakur û Rojhilatê Sûriyê, bendek ji hesin ê parastinê ava kirin.
Ji ber wê jî dema em 1’ê Mijdarê bibîr bixin, lazime em ked û tekoşîna şervanên azadiyê yên bi canê xwe bendek ji hesin li pêşiya dijminên vê herêmê û di serî de jî li pêşiya Dewleta Tirk ava kirin, ji bîr nekin. Di encamê de em dinerin dewleta Tirk û şefê faşîst Erdogan, her çendî rojan gefa êrişên nû li dijî herêmê dixwar jî, çira kesik ji aliyê navdewletî yên di Sûriyê de xwedî bandor wekî Rûsiya û Amarika wernegirtiye.
Ez di vir de ne dibêjim Amarika û Rûsiya piştgiriya gelê herêmê dikin, lê ew dizanin di herêmê de hêz û vînek mezin heye, ji ber wê jî nikarin bi hêsanî bazarên xwe bi cih bînin. Hêmanê wê yê bingehîn jî Berxwedana Kobanê ye.
Dewleta Tirk jî li dijî wateya vê rojê bi her awayekî di nava hewldanan de ye. Ji lewma bi her rê û rêbazan dixwaze derbeyan di Kobanê de, li gelên Bakur û Rojhilatê Sûriyê bixwîne. Ev bi êrişên rojane li dijî Kobanê û gundên wê, an jî bi siyasetên valakirin û dûrxistina ciwanan ji Kobanê pêk tê.
Dibe hin kes pirs bikin, ma çi li Kobanê heye? Kobanê di dîroka Şoreşa Bakur û Rojhilatê Sûriyê xwedî giringî û wateyeke mezine. Şoreşa 19’ê Tîrmehê ji wir destpê kir. Berxwedana Kobanê berdewam kir û 1’ê Mijdarê bi encam kir. Ji bo wê jî dijber, bi hemû rê û rêbazan hewl didin vê watedariyê ji xelkên wê bigirin.
Li ser wî esasî ji xelkên Kobanê û tevahî gelê Bakur û Rojhilatê Sûriyê û gelê kurd bi giştî jî tê xwestin ku bi rihê Berxwedana Kobanê xwedî li hêzên xwe yên leşkerî û hemû destkeftiyên xwe derkevin.
