DILYAR CIZÎRÎ
Çend rojên din salvegera 8’an a 1’ê Mijdarê Roja Kobanê ya Cîhanê ye. Ew roj di dîroka gelê kurd a tekoşîna azadiyê zêde bû û bû hêmana bingehîn a têkçona DAIŞ’ê. Di heman demê de derbeyek mezin li piştevanê wan jî hat xistin.
Di wê rojê de li çar hêlên cîhanê demokrat, sosyalîst, rewşenbîr, nivîskar û hunermend ji gelên cuda bi bi milyonan mirov, derketin kolanan û destek dane berxwedêrên Kobanê. Ew roj ji gelê kurd re pêngaveke nû ya serkeftinê bû.
Îro gelê kurd li bendê ye ku pêşwaziya 1’ê Mijdarê bike. Dewleta Tirk a hebûna xwe bi qirkirina gelê kurd ve girêdaye, bi her awayekî êrişên xwe didomîne û dixwaze dawî li tekoşîna azadiyê ya gelê kurd bîne.
Êrişên li dijî Gêrîla derxistiye asta herî jor û çekên kîmyawî û cûreyên din ên çekên qedexekirî bikar tîne. Em dinêrin rojane ji herêmên Zap, Metîna û Avaşîn dîmenên êrişên hovane yên dewleta Tirk tên belgekirin û bi raya giştî re tê parvekirin. Lê mixabin hîn jî cîhan û civaka navdewletî û taybet jî saziyên qedexekirina çekên kîmyawî, çavên xwe ji vê rastiyê re digirin.
Ev jî piştevaniya wan a bi dewleta Tirk re nîşan dide. Di heman demê de êrişên li ser herêmên Bakur û Rojhilatê Sûriyê, bi gelek rê û rêbazan bi armanca valakirina herêmên Rêveberiya Xweser û têkbirina aramiyê, bê navber dewam dike.
Li aliyê din jî zext û zordariya li dijî Bakurê Kurdistanê derxistiye asta herî jor. Plan û êrişên dewleta Tirk ên li hemû aliyan, di çarçoveya yek planî de pêk hatiye. Bingeha wan jî tecrîda girankirî ya li Imralî yê ye.
Li beranberî êriş û planên dewleta Tirk, gelê kurd li ser piya ye û di nava tevger û çalakiyan de ye. Niha em dinerin li dijî bikaranîna çekên kîmyawî û ji bo piştevaniya berxwedana gêrîlan, li hemû aliyên cîhanê çalakiyên gel têne lidarxistin.
1’ê Mijdarê Roja Cîhanê ya Kobanê gel bû stûneke bingehîn a piştevaniya şervanên YPG/YPJ’ê û tekoşîna li dijî DAIŞ’ê ku piştevanê wê ya herî mezin dewleta Tirk bû, bi serket û di encam de DAIŞ li Baxozê di aliyê leşkerî de hat şkandin.
Niha jî pêwîstî pê heye ku bi rihê 1’ê Mijdarê ev pêvajoye veguhere pêngaveke din a piştgiriya gêrîlayên azadiya Kurdistanê yên di şert û mercên herî zehmet de li dijî alav û teknîna pêşketî ya dewleta Tirk û kîmsalê, li ber xwe didin.
Ji hemû gelê kurd û dostên wan tê xwestin ku di 1’ê Mijdarê de, rihê berxwedanê derxin asta herî jor. Divê saziyên qaşo ji bo qedexekirina çekên kîmyawî hatine avakirin û niha erka xwe pêk nayînin, mecbûr bibin ji bêdengiya xwe derkevin.
Em ji bîr nekin ku hêzên gêrîla berxwedana Kobanê geşkirin û rola wan a serkeftina Kobanê ya sereke bû.
Niha ji her kesî tê xwestin ku bi rihê 1’ê Mijdarê li dijî bikaranîna kîmsyalê û şehîdxistina gêrîlayan, erk û berpirsyariyên xwe pêk bînin.