Navenda Nûçeyan
Serhildanên gel yên ku li dijî rêjîma Îranê li Rojhilatê Kurdistan û tevayiya Îranê belav bûne, roj bi roj firehtir dibin û êdî xwendekar pêşngtiyê dikin.
Li gor agahiyên hatîn bi destxistin, li bajarên Merîwan, Sine, Seqiz, Kirmanşan, Bane, Mehabad, Şîraz, Tehran û li gelek bajaran xwendekar neçûn dibistanê. Di heman demê de Sendîkaya Mamosteyan banga grevê li mamosteyan kiribû. Hatibû xwestin ku bila mamoste biçin dibistanê lê nekevin dersan. Herwiha bang li malbatan jî hatibû kirin ku bila malbat zarokên xwe neşînin dibistanê. Mamoste çûn dibistanê lê, neketin dersan. Di 23’ê Cotmehê de mamosteyan tevî xwendekaran li gelek bajaran, çalakiya rûniştinê li dar xistin û banga rejîmê kirin ku mamoste û xwendekarên girtî werin berdan.
Li Tehranê li Zanîngeha Şerîfê di navbera hêzên Basîc û xwepêşandaran alozî çêbû. Hêzên Basîcê deriyê xwarinxaneya zanîngehê girtibûn, xwendekaran bariyerên hêzên Basîcê derbas kirin û ketin xwarinxaneyê. Herwiha li Zanîngeha Razî ya Kirmanşanê, Zanîngeha Zanistanên Tipê ya Zahîdanê, Zanîngeha Zanistên Civakî ya Tehranê, Zanîngeha Şerîf, Zanîngeha Emîr Kebîr, Zanîngeha Tehranê, Zanîngeha Meşhed Fîrdewsî, Zanîngea Îsfahanê û li gelek zanîngehên Îranê, xwendekaran rejîma Îranê protesto kirin.
Li Merîwan, Ciwanro û Seqizê mamosteyan mesaî boykot kirin. Qetilkirin û girtina mamoste û xwendekaran şermezar kirin.
Li Sinê jî hêzên Îranê gule li xwendekarên jin reşand. Li herêmên cihê yên Rojhilatê Kurdistanê û Îranê xwendekarên amadekariyê, di nava dibistan û derveyî wê tevlî protestoyan dibin.
Di şeva 23 Cotmehê de li herêmên Sine, Diwander, Serdeşt ên Rojhilatê Kurdistanê û li herêmên eyaletên Bender Abbas û Mazandaranê xwepêşandanên protestoyê hatin lidarxistin.