Navenda Nûçeyan/Qamişlo
Endamê Konseya Rêveber a KCK’ê Mûstafa Karasû bang li gelê Kurd kir ku li hemberî êrîşên kîmyewî rabin û got, şerma herî mezin a dîrokî ye ji bo PDK’ê ku bikaranîna gazên bi jehrî û çekên kîmyewî dinixumîne.
Endamê Konseya Rêveber a KCK’ê Mûstafa Karasû tevlî bernameya taybet ya televîzyona Medya Haberê bû û li ser tecrîdkirina Rêberê Gelê Kurd Abdullah Ocalan û êrişên kîmyawî yên dewleta Tirk ya dagirker nirxand.
Mûstafa Karasû diyar kir ku yekane polîtîkaya dewleta Tirk ya dagirker, tepisandina hişmendî, rêxistinî, armanc, hesret û têkoşîna vî gelî ye û got, dewleta tirk di vê çarçoveyê de Rêber Apo tecrîd dike. Mûstefa Karasû da zanîn ku Rêber Apo dibe ku ji aliyê fîzîkî ve tecrîdkirîbe, lê belê Rêberekî welê ye ku ti carî nikare bê tecrîdkirin.
Mûstafa Karasû da xuyakirin ku Rêber Apo bi fikrên xwe ne tenê bandorê li gelê Kurd dike û got, Rêber Apo bandorê li gelên Rojhilata Navîn û tevahiya cîhanê dike.
Herwiha diyar kir ku gelên Rojhilata Navîn ji fikrên gelê Kurd hêz digirin û wiha domand: “Gelên cîhanê giştî ji fikrên Rêber Apo hêz digirin û Rêber Apo yekane rêberê niha ye ku çareseriyê ji pirsgirêkên li cîhanê re peyda kiriye, pêşniyar kiriye.”
Karasû destnîşan kir ku nerazîbûna raya giştî ya li hemberî çekên kîmyewî girîng e û got, divê gelê Kurd rabe ser piyan û hêzên demokratîk nerazîbûnê nîşan bidin û li hember vê faşîzmê rabin.
Endamê Konseya Rêveber a KCK’ê Mûstafa Karasû bi tundî PDK`ê rexne kir ku li pêşiya heyetên ji bo lêkolînkirina êrîşên kîmyewî bû asteng û got, dewleta Tirk bêguman dijmin e, êrîş dike. Ewropa jî berjewendiyên xwe hene, rastiyan ji nedîtî ve tê. Lê belê ya herî giran û bi êş PDK`ê ye. Van êrîşan dinixumîne. Pêşî li mirovan digire ku dixwazin biçin herêmên çeên kîmya hatîne bikaranîn. Lê ew sûcên Tirkiyeyê dinixumîne. Nixumandina sûcên Tiriyeyê ji PDK’ê re maye. Şerma herî mezin a dîrokî ye ji bo PDK’ê ku bikaranîna gazên bi jehrî û çekên kîmyewî dinixumîne.
